Siglir tar il cuntegn

Header

Navigaziun

Legenda: Guardar il video Scena or dal teater: Ina muntaniala en quater. Durada 07:27 minutas.
Or da RTR dals 14.10.2015.
cuntegn

Surselva Vuorz fa quest onn puspè teater

Per il giubileum da 20 onns Uniun da teater Vuorz preschenta l’uniun suenter in pausa puspè ina producziun.

Il giubileum da 20 onns Uniun da teater Vuorz è stà la motivaziun da tschertgar giugaders e da puspè dar suenter 6 onns in toc da teater, ha ditg la cassiera da l’uniun Gianna Ringeisen. La raschun principala ch’in na po betg vegnir giugà teater ina giada per onn saja ch’ils commembers hajan bler auter da far e strusch peda ed abiteschian per part era en la bassa. Co quai va vinavant cun l’uniun è anc intschert. Sco quai che Gianna Ringeisen di, veglian ils commembers activs, sch’igl è insaco pussaivel mantegnair l’uniun.

Cumedia criminala

Preschentà vegn ina cumedia criminala cun il titel «Ina muntaniala en quatter». Scritta è quella vegnida da Wolfgang Kolhaase e Rita Zimmer e quai sut il titel «Fisch zu viert». La translaziun en rumantsch ha Andrea Veraguth de Groot fatg. En il toc vai per trais soras che vivan ensemen en la medema chasa cun lur servient. Tuttas trais soras han ina affera cun il servient. Mintgina quinta dentant ch’ella saja la suletta che haja in affera cun il servient. Cura ch’il servient è unfis e pretenda daners da las soras escalescha la situaziun.

Puncts culminants

Puncts culminants da l’Uniun da teater Vuorz è segir la preschentaziun dal toc «Valdei als da Valdei». In toc preschentà il 2002 en la ruina dal chastè da Munt S. Gieri e nua che prest l’entir vitg è stà involva. Per il giubileum da 10 onns ha l’uniun organisà l’emprim festival da teater rumantsch.

Producziuns

Producziuns en chasa da scola a Vuorz:

  • Sonda, ils 17 d’october 2015
  • Venderdi, ils 23 d’october 2015
  • Sonda, ils 24 d’october 2015
  • Venderdi, ils 30 d’october 2015
  • Sonda, ils 31 d’october 2015

Producziun en il Cinema Sil Plaz a Glion:

  • Venderdi, ils 13 da november 2015
  • Sonda, ils 14 da november 2015

Las preschentaziuns cumenzan mintgamai las 20.15