Siglir tar il cuntegn

Header

cuntegn

Surselva Vuorz: Bar «Miret» en il territori da skis devastada

Durant la notg da gievgia grassa sin venderdis è la tegia da la bar da naiv «Miret», la tegia da l’Alp Dado Sura, vegnida devastada da laders.

Il directur da las pendicularas Breil Vuorz Andiast, Beat Zenklusen, n’avess mai spetgà ch’i dettia ina giada in ladernitsch cun infracziun en la tegia da la bar da naiv «Miret». La bar sa chatta sin 2’070 meters sur mar, en la tegia da l’Alp Dado Sura, ed è cuntanschibla mo cun skis u cun chalzers da naiv. Il lader, u ils laders, sto esser ì almain 1 ura a pè per arrivar a la tegia.

Nagin alarm, naginas cameras

La tegia da la bar «Miret» n’è fin uss betg stada segirada cun in alarm u survegliada cun cameras. Quai duai dentant sa midar. En l’avegnir vulan las pendicularas survegliar era la bar «Miret» cun meds electronics, sco las ulteriuras bars e restaurants en il territori da skis.

audio
Bunura: Bar da naiv Miret a Vuorz devastada
ord Actualitad dals 02.03.2017.
laschar ir. Durada: 2 minutas 19 Secundas.

Grond butin n’han ils laders betg fatg. Il pli custaivel è tenor Beat Zenklusen il laptop cun las chanzuns da la bar. Daners na sajan betg vegnids engulads, las cassas da la bar vegnian svidadas mintga saira. Il mender saja stà il dischurden en la tegia.

Sonda puspè avert

Il venderdi è la tegia restada serrada per che la Polizia chantunala possia fotografar e segirar ils indizis. Silsuenter han ils emploiads da las pendicularas nettegià la tegia e la sonda era la tegia puspè averta, declera Zenklusen.

En la tegia da l'Alp dado sura è vegnì rut en.
Legenda: En la tegia da l'Alp dado sura è vegnì rut en. Pendicularas Breil Vuorz Andiast

Sin dumonda ha la Polizia chantunala anc betg savì dar dapli infurmaziuns a RTR. Las investigaziuns pertutgant quest cas na sajan anc betg terminadas.

RR actualitad 08:00

Artitgels legids il pli savens