La pendiculara da Cassons è vegnida serrada il 2014 e rutta giu l'onn passà. Dapi quasi 4 onns na datti pia nagina colliaziun cun pendiculara fin si Cassons.
80 milliuns custa la nova pendiculara
En tut custa la pendiculara 80 milliuns francs e da quels custs sto la vischnanca surpigliar 20 milliuns. Ulteriurs 20 milliuns duai l'Arena Alva pajar, il rest da 40 milliuns vegnian ad esser emprests da las bancas. L'opposiziun en vischnanca cunter quella fatschenta che vegn ils 19 da matg a l'urna è be sporadica, ma i dat ella.
Las reproschas dals critichers
Ils puncts che vegnan mess en dumonda èn:
- Ins na sappia betg, cura che quests 20 milliuns sajan da pajar.
- Las decisiuns davart la pendiculara vegnian pli tard prendidas tuttas da la nova Cassons SA.
- Il suveran na vegnia betg dumandà en chaussa.
- La pendiculara nova na giaja betg fin sin il Fil da Cassons, mabain chalia gia sin ils Cugns – 300 meters pli engiu.
Messadi reagescha sin critica
Tenor il messadi repartì en las chasadas èn las respostas formuladas uschia:
- Cugns valia sco punct optimal cun invista en l'Arena tectonica Sardona.
- Ils represchentants en la nova Cassons SA sajan persunas ord il gremi da la suprastanza da la vischnanca da Flem, da la Arena Alva e persunas independentas.
- Flem stoppia pajar pir cura ch'i vegnia entschet a bajegiar l'emprima etappa, lura 10 milliuns e tar la segunda etappa anc ina giada 10 milliuns.
RR actualitad 17:00
