Siglir tar il cuntegn

Header

cuntegn

Surselva Vischnancas sustegnan Center sursilvan d’agricultura

Ils 27 da november 2016 ha il Parc Adula fatg naufragi. En ina votaziun è quest project vegnì refusà. Ina consequenza è stada che 15’000 francs han mancà per il Center sursilvan d’agricultura. Perquai ha quel fatg 2017 in deficit da circa 20’000 francs.

Sco il president da l’uniun dal Center sursilvan d’agricultura (CSA) Giusi Flepp di, hajan els pudì rimnar ils daners necessaris. Las vischnancas da Tujetsch, Mustér, Medel, Sumvitg e Trun han concedì ils daners per ils proxims 5 onns. Uschia saja era la plazza da la manadra da fatschenta Tabea Baumgartner segirada. Sco manadra dal CSA lavura ella 60%. Quest post vegn era finanzià cun daners da sponsurs, dals 110 commembers, da fundaziuns e da las entradas dals arranschaments.

audio
Bunura: Center sursilvan d'agricultura Mustér è puspè finanzià
ord Actualitad dals 13.04.2018.
laschar ir. Durada: 1 minuta 29 Secundas.

Activitads d'infurmaziun e cultura purila

Cun quests daners organisescha ella differentas occurenzas per il CSA, tranter auter curs, films, referats ubain discussiuns sur dal puresser. Plinavant promova ella products indigens, realisescha projects en il sectur da l’agricultura e dal turissem e maina l’Academia Vivian (là organisescha ella excursiuns e dis tematics per scolas e gruppas). Ina finamira dal CSA è era dad intermediar il dialog tranter l'agricultura, il turissem ed il commerzi.

L'onn 2017 ha il CSA organisà ca. 30occurrenzas. Da quai da 700 persunas han visità las atgnas occurenzas e ca. 250 persunas las occurenzas organisadas ensemen cun auters partenaris.

Trais onns manadra da fatschenta

Tabea Baumgartner beneventa la decisiun dallas 5 vischnancas. Quai saja in signal positiv per la lavur dal CSA. I saja fitg motivond che questa lavur vegnia sustegnida enavant suenter il na al Parc Adula. Ella sa legria da collavurar cun las vischnancas e da realisar novs projects.

Tabea ha 28 onns e lavura dapi il favrer 2015 sco manadra da fatschenta en il Center sursilvan d’agricultura. Ella è oriunda dal chantun Argovia ed ha studegià geografia ed istorgia.

RR actualitad 06:00

Artitgels legids il pli savens