L'onn da scola 2014/2015 è stà il davos onn che la vischnanca da Medel/Lucmagn ha gì ina scolina. Ussa vegn era la scola primara serrada. Quest onn frequentan 9 scolars la scola a Curaglia en quatter differentas classas. L'auter onn èn quai anc 6 scolars en 3 classas.
Tenor il vicepresident communal Giusep Flepp fiss quai anc adina avunda scolars per pudair mantegnair la scola. La suprastanza ed il cussegl da scola hajan discutà la situaziun seriusamain e sajan vegnids a la conclusiun ch'il temp per serrar la scola saja ussa arrivà.
Decisiun a favur dal scolar
Tar la decisiun saja il bainstar dals scolars stads en il center e na betg las finanzas, punctuescha Giusep Flepp. Cunzunt la cumpagnia, ils contacts socials e la pussaivladad da pudair sa barattar ora cun scolars da la medema classa, sajan stads motivs per la decisiun. L'auter onn è la situaziun uschia, ch'in scolar frequenta la quarta classa, trais la tschintgavla e dus la sisavla. Da vart dals geniturs n'haja quai dà naginas reacziuns suenter la communicaziun. I saja dentant era gia stat cler, che quai capitia proximamain, declera Giusep Flepp.
Scolastas perdan lur plazza
Previs èsi ch'ils scolars van a Mustér a scola, sco quai ch'igl è gia usità tar il stgalim superiur. Ils discurs cun la vischnanca da Mustér na sajan dentant aunc betg fatgs. Pertutgadas da quella decisiun èn era las quatter scolastas che perdan lur plazza a Curaglia. Sco Giusep Flepp di, deploreschia la vischnanca quai, saja dentant pronta da sa gidar e porscher maun sche las scolastas dovrian agid per chattar ina nova plazza.
RR novitads 12:00