Siglir tar il cuntegn

Surselva Vischnanca burgaisa da Schluein sa schlia fin il 2015

Cun ina part dal possess duai vegnir fundà ina fundaziun per promover sport e cultura a Schluein.

La vischnanca da Schluein.
Legenda: La vischnanca da Schluein. RTR, L. Livers

Tenor il cassier da la vischnanca burgaisa, Marcus Holderegger vegnan ils meds liquids e las aczias da la Gera Betun Schluein SA, ch'èn el possess da la vischnanca burgaisa, transferì a la Fundaziun burgaisa Schluein. En tut èn quai rodund 650’000.- francs. Il rest dal possess va a la vischnanca politica, che paja da sia vart 150’000.- francs a la fundaziun. En tut dispona la fundaziun da rodund 800’000.- francs per promover projects da cultura e sport a Schluein.

3 persunas decidan

Il cussegl da la nova fundaziun sa cumpona da 3 persunas: il president communal da la vischnanca da Schluein (ex officio, actual è quai Bruno Wellinger) e duas persunas cun domicil a Schluein. Quellas duas persunas duain garantir ch’ils daners da la fundaziun vegnian duvrads per projects a Schluein, era sch’il president communal na fiss betg da Schluein. Quai savess esser il cas, sche la vischnanca fusiunass en l'avegnir cun in’autra vischnanca.

Nagin interess

Che la vischnanca burgaisa sa schlia, n’è per Marcus Holderegger betg ina surpraisa. L'interess dals burgais per la vischnanca burgaisa saja adina vegnì pli pitschen, e la vischnanca burgaisa sezza haja adina gì pli paucas incumbensas. Las natiralisaziuns succedian oz per gronda part entras disposiziuns surordinadas dal chantun, ed il pauperesser hajan ils burgais surdà a la vischnanca politica gia avant 2 onns. Perquai hajan ils burgais era decidì unanimamain da schliar la vischnanca burgaisa.