La primavaira 2020 avess la societad da musica da Vignogn vulì festivar il giubileum da 100 onns. Ma pervia da corona è quella vegnida spustada sin il matg 2021. E puspè ha la pandemia fatg in stritg atras il quint. Uss duai la festa da giubileum esser ils 13 e 14 da matg 2022. Per quest giubileum datti era ina cronica.
Tschop blau, libroc cotschen e chautscha naira
Ma gia la dumengia passada, il di da perdunanza, èn musicantas e musicants sa preschentads en unifurmas novas e cun instruments novs. L’unifurma è: Tschop blau, libroc cotschen e chautscha naira.
Sculptura d'Alfons Montalta
Part da questa festa cun in concert da la musica, è era ina sculptura da l’artist Alfons Montalta da Morissen. Ella simbolisescha ina clav violina cun la vopna da Vignogn che regorda al giubileum da 100 onns.
La societad da musica da Vignogn ha success – en in vitg cun ca. 150 abitants ed abitantas. Quai saja d’engraziar surtut al dirigent, di Erwin Derungs, il president da la musica. Els sajan dentant era dependents da musicantas e musicants d’ordaifer il vitg. Ma el constatescha ch’i dettia pli e pli paucs musicants e musicantas giuvenas. Per tegnair il nivel saja quai impurtant dad era dar concerts cun musica moderna, quai plaschia als giuvens.
