Per far segira la via che maina da Mustér en Val Medel e da là sur il Pass Lucmagn è in excavatur di e notg vi da far vegnir giu crappa e material. Tenor Eugen Duff, manader dal distirct 6 da l'Uffizi da construcziun bassa, dovra quai ses temp tochen che 500 meters cubics material èn a val. Per schanegiar la via chantunala ch’è vegnida renovada en quest lieu avant strusch dus onns, dovra quai dentant era precauziun.
Privel era enconuschent – ma betg qua
Ils geologs han gia avant 20 onns stimà ils privels en las Ruinas, tranter Mustér e Curaglia. La spunda ch’è il mument il problem era vegnida taxada sco nunproblematica, di il geolog Ruedi Krähenbühl. Ma tut na possian ins betg vesair, surtut cura che la vegetaziun cuvri parts dal grip, accentuescha il geolog. Suenter las lavurs saja dentant anc da stimar danovamain la situaziun per pudair giuditgar sch'i dovra mesiras supplementaras, di Ruedi Krähenbühl.
Via betg uffiziala
La via n'è betg uffiziala e la vischnanca da Medel sco era il chantun na communitgeschan betg ch'i dettia ella. Ed igl è era betg simpel da chattar la via nua ch'i è atgnamain scumandà da charrar.
RR actualitad 18:00