La varianta preschentada saja la meglra pussaivla. Uschia è il project vegnì dividì en duas parts. Ina giada en il vest da la vischnanca nua che la via forestala duai far accessibel ils guauds sur Segnas e nua che la via nova duai era pussibilitar a la meglieraziun instradada da realisar quella, uschia l’argumentaziun da la suprastanza. Prioritar saja dentant da far accessibel il guaud Run, gist sur il vitg da Mustér. Qua sajan ins gia dapi 20 onns vi da far ponderaziuns co meglierar l’access, uschia la suprastanza. La varianta preschentada prevesa l’access sur la Val Sogn Placi e lura si en il guaud Run. Quella varianta saja buna perquai ch'ils lieus abitads n’avessan betg traffic grond da camiuns ed il guaud pudess vegnir tgirà a moda adequata e cun maschinas grondas.
Custs pli auts
Per realisar tut èsi calculà cun custs da radund 24,5 milliuns francs. La gronda part portan er quella giada chantun e Confederaziun. Tuttina resta a la vischnanca anc da pajar 5,6 milliuns, quai che munta in augment da custs en cumparegliaziun cun la varianta refusada il 2020 da 1,7 milliuns francs. In problem è uss schlià, uschia na tanghescha il project actual betg pli la protecziun da las auas. Quest punct era probabel stà il crap da stgarpitsch per la decisiun dal pievel da refusar la varianta veglia. Che quest guaud dovria urgent tgira, er per las proximas generaziuns, saja betg dispitaivel e stoppia vegnir fatg urgentamain, perquai che 20 onns hajan ins uss discutà sur da pussaivladads e uss dovria ina varianta pratitgabla, uschia l’argumentaziun da la suprastanza.
