La gievgia ils 14 da fanadur ha la regenza grischuna communitgà, ch'ella approveschia la revisiun parziala da la planisaziun locala da Mustér. Quella ha il pievel decidì il november passà. Cun quella approvaziun pussibiliteschia il Chantun a la Sersa da sa chasar a Muster, uschia la regenza grischuna en sia communicaziun. La parcella da radund 7'000 meters quadrat a Pignola vegn enzonada en la zona da mastergn.
Chantun di «Gea» – e la Sersa?
L’interpresa che fa lavurs da mantegniment e contruescha novs binaris da viafier sto tschertgar in nov domicil perquai ch’ella stoppia bandunar las remisas da locomotivas da la Viafier d’Arorsa a Cuira, sco il CEO da la Sersa Group Svizra SA, Rudolf Krauer ha ditg. Cunquai che la Viafier retica e la Viafier Matterhorn Gottard sajan lur gronds clients en il sectur da viafiers a binari stretg dovrian els in domicil en il Grischun. Entras la collavuraziun cun la fatschenta indigena Berther Bau und Industrie SA saja il territori a Pignola a Mustér vegnì en discussiun. Davent da quel lieu saja quai pussaivel d’avair in access direct als binaris da la Viafier Matterhorn Gottard.
Anc betg fix a Mustér
Tenor Rudolf Krauer hajan ils possessurs da l’interpresa dentant giavischà ch’i vegnia betg focusà mo sin in lieu. Uschia vegn era tschertgà en la regiun tranter Landquart e Tusaun in lieu adattà. Sche pussaivel cun access era als binaris da las Viafiers federalas. I saja però grev da chattar là il terren giavischà, uschia che Mustér na saja betg sclaus dal tut sco lieu.
100 plazzas fissan bun per Mustér
Sco il president da vischnanca da Mustér, Francestg Cajacob di, fiss quai fitg bun sche l’Interpresa vegniss a Mustér. Quai dess plazzas da lavur e d’emprendissadi. Sco Rudolf Krauer conferma vegnissan probabel enturn 100 plazzas a Mustér. La vischnanca sco tala na possia dentant betg far bler per motivar da vegnir a Mustér. Francestg Cajacob manegia che tals concerns dovrian auters criteris ch’in bun pretsch dal terren. Sch’i avess dentant da giaschair vid quai, lura fiss la vischnanca pronta da contribuir ina cumpart. Rudolf Krauer spera da pudair decider anc quest onn nua che la nova sedia vegn. Sch’il project na vegn betg realisà a Mustér ed i na vegn bajegià nagut sin il terren ch’è vegnì enzonà da nov en la zona da mastergn, pretenda il chantun che quel vegnia puspè prendì ord la zona suenter tschintg onns.
Sistì decisiun
Il suveran da la vischnanca da Mustér aveva era decidì d’enzonar ulteriurs bel e bun 20’000 meters quadrat. La regenza grischuna ha dentant sistì l’approvaziun da questa part da la revisiun parziala da la planisaziun locala. Quai fin ch’il terren ch’è ussa en zona da mastergn è surbajegià e la vischnanca po mussar si al chantun che ulteriur terren vegn duvrà. Quai blochescha actualmain trais autras fatschentas indigenas ch'avessan interess da vegnir cun lur fatschentas sin quest terren.