Siglir tar il cuntegn
Inhalt

Surselva Val Strem: Privel resta acut e la val serrada

Suenter la bova dals 14 da mars 2016 en la Val Strem è quella stada serrada cumplettamain. Mesiraziuns dalla stad passada mussan che la grippa è anc adina en moviment ed il privel d'ina crudada grippa è anc adina acut.

Il geolog Yves Bonanomi ed il president da vischnaunca Beat Roeschlin han infurmà la populaziun.
Legenda: Il geolog Yves Bonanomi ed il president da vischnaunca Beat Roeschlin han infurmà la populaziun. RTR, Gion Hosang

Sco quai ch'il geolog Yves Bonanomi ha ditg, sajan tschertas parts sa muventadas durant in onn dad in fin dus meters e per part schizunt tschintg meters. Quests moviments enorms hajan ins pudì constatar tar mesiraziuns cun ina drona. Atgnamain avessan quels var 250'000 meters cubic grip ch'èn periclitads da crudar gia dad esser crudads tar tals moviments. Perquai sappian ins uschia che las massas da grippa stoppian esser curt avant crudar ed il privel saja acut, declera Yves Bonanomi. Ma ins na sappia betg dir sche quai capitia quest atun u pir primavaira.

Critica ch'i saja exagerà da serrar la val

Tras la Val Strem maina ina senda fitg enconuschenta ed er tar ils skiunz da turas è ella fitg enconuschenta. Entras il privel acut restia la val dentant vinavant serrada per in e scadin. Il president Beat Roeschlin metta a cor quai a finadin. La vischnanca haja survegnì bleras reacziuns gia suenter la bova dal mars 2016 perquai ch'i hajan serrà la val e renfatschas che quai saja exagerà. Sco Beat Roeschlin ha ditg na dettia quai era nagina opziun da manar il trutg da l'autra vart da la val sper la bova ora. Sche quella vegnia numnadamain a val sche dettia quai ina unda da pressiun da lezza vart da la val si che saja mortala per persunas che sa chattian là. Ma el ha era ditg che suenter ils 23 d'avust cura ch'igl è vegnì giu la bova dal Piz Cengalo a Bondo saja stà quiet.

Suenter las renfatschas ch'i ha dà a Bondo pervi da l'infurmaziun davart il privel vegn era anc ina giada fatg ponderaziuns tar la vischnanca da Tujetsch sch'igl è da meglerar questa.

Nagin privel per Sedrun

Quai ch'è era vegni intercurì e calculà è tge effect ch'ina ulteriura bova avess per Sedrun. Tenor Yves Bonanomi n'è il vitg er tar ina ulteriura bova betg periclità. Il material ch'è vegnì gia a val il 2016 franass tut quai che vegn surengiu, uschia che quel na po betg vegnir da la val ora fin Sedrun u en la vischinanza.

Las dimensiuns da la bova en la Val Strem

La bova dals 14 da mars 2016 aveva purtà a val 225'000 meters cubic material. Perquai era la val vegnida serrada per viandants e per sportists da skis da turas.

RR novitads 22:00