Siglir tar il cuntegn

Header

Navigaziun

Visualisaziun da la halla polivalenta projectada a Val
Legenda: Visualisaziun da la halla polivalenta projectada a Val. mad
cuntegn

Surselva Val: Concurrenza d’achitectura per la halla polivalenta è finida

La primavaira 2016 aveva la vischnanca da Val s. Pieder publitgà ina concurrenza da project per questa halla nova. Gudagnà ha il project 'Follow - Me' dal biro d’architectura SAM architects e partenaris SA da Turitg.

Resguardar topografia e clima local

L’incumbensa da la concurrenza è stada d'elavurar propostas per engrondir la chasa da scola a moda persistenta, e quai cun ina halla polivalenta, stanzas da scola, ina pratica da medi e stanzas per ulteriurs utilisaders. La sfida per ils architects saja stada da realisar quest project cun resguardar la topografia alpina ed il clima local en las relaziuns da plaz limitadas, scriva la giuria en ina communicaziun a las medias.

Calcular ils custs

Sco proxim pass vegn la suprastanza da la vischnanca da Val a repassar il preproject ensemen cun ils architects ed elavurar in project da construcziun. La finamira saja da pudair calcular ils custs.

Visualisaziun interna da la halla polivalenta projectada a Val
Legenda: Visualisaziun interna da la halla polivalenta projectada a Val. mad

Circa 12 miliuns francs

Ins quintia che la halla nova custia var 12 milliuns francs, ha il president da la vischnanca da Val Stefan Schmid ditg ad RTR. La finala decidan votantas e votants davart dal credit.
Gia il 2012 cura che la vischnanca aveva vendì la terma a l'investider Remo Stoffel, eran ins sa cunvegnids che la vischnanca sa participeschia als custs d'ina halla polivalenta nova.

RR Novitads 17:00