Siglir tar il cuntegn

Surselva Val: Cas massiv da palusa bletscha

Sin la Lampertschalp en vischinanza dal lai da Zervreila è rut ora a moda massiva la palusa bletscha. Bundant la mesadad da l'entira scossa (650 nursas) è s'infectada. Entant s'haja dentant sut controlla la malsogna.

Ina scossa da nursas.
Legenda: La mesadad da la scossa sin la Lampertschalp è s'infectada cun la palusa bletscha. RTR, Linus Livers

Il veterinari chantunal Rolf Hanimann discurra d'in cas massiv da la malsogna. Uschè massiva che l'Uffizi chantunal ha gì da sustegnair il paster tar il tractar las nursas.

Trais giadas èn las nursas malsaunas vegnidas bagnadas en in bogn dischinfectant. La mesadad da las nursas infectadas han lura tuttina stuì bandunar l'alp, l'autra mesadad ha pudì restar. Novas infecziuns n'haja quai betg pli dà, ha Rolf Hanimann declerà.

Populaziun da capricorns en vischinanza

In privel è la malatia er per la populaziun da capricorns en la vischinanza da l'alp. Capricorns pon era s'infectar cun la palusa bletscha e reageschan fitg sensibel sin la malatia. Quai saja stà conscient al veterinari chantunal, ha'l ditg envers RTR. Perquai haja quai era dà ina collavuraziun fitg stretga cun l'Uffizi da chatscha.

L'inspectur da chatscha Georg Brosi conferma che la collavuraziun haja funcziunà fitg bain. Ins haja decidì ina simpla strategia, numnadamain dad evitar che las nursas vegnian en contact cun ils capricorns.

Enfin ussa quintan tant Georg Brosi sco er Rolf Hanimann, ch'i n'ha betg dà infecziuns da la palusa bletscha tar la populaziun da capricorns.

Malatia che sa lascha curar bain

La palusa bletscha è in inflammaziun da l'ungla (Klauenfäulnis, Moderhinke).Ella sa lascha curar fitg bain cun bogns dischinfectants, sa derasa dentant fitg spert.

Enturn 650 nursas passentan la stad sin la Lampertschalp tranter il lai da Zervreila e la chamona Länta dal CAS. Igl è la segunda alp ch'è pertutgada da la palusa bletscha questa stad en Grischun.

RR actualitad 12:00