Siglir tar il cuntegn

Header

audio
Myriam Pelican na lascha betg vaccinar ses uffants
Or da Actualitad dals 14.01.2022.
laschar ir. Durada: 03:26 minutas.
cuntegn

Vaccin da corona per uffants Ina famiglia ch'è sa decidida encunter

Davent da l'emna passada pon uffants tranter tschintg ed indesch onns era laschar vaccinar cunter il coronavirus. Malgrà che la figlia da Myriam e Robert Pelican pudess uss pia sa laschar vaccinar, han els decis da desister da la squitta.

I saja stà cler davent da l'entschatta ch'ella e ses um na laschian betg vaccinar ils uffants cunter corona, di Myriam Pelican. Sia opiniun è ch'ils uffants ston vegnir en contact cun virus, bacterias e malsognas – e quai possian els far il meglier senza ina vaccinaziun. Sch'il corp d'in uffant vegnia influenzà d'ina vaccinaziun, na possian els betg pli bajegiar si uschè bain il sistem d'immunitad.

En cas da malsogna ponderar duas giadas

Sa laschar vaccinar encunter corona pon tut ils uffants tranter tschintg ed indesch onns. L'Uffizi federal da sanadad BAG cusseglia dentant il vaccin cunzunt a quels ch'èn en contact cun persunas da ristga che na pon betg sa laschar vaccinar ed uffants che han malsognas cronicas. Myriam Pelican ponderass en uschia ina situaziun dentant tuttina duas giadas sche la squitta fiss la meglra decisiun per ses uffants.

En uschè ina situaziun faschessan nus tut per bajegiar si lur sistem d'immunitad. I dat blers meds a basa natirala – e forsa era betg mo a basa natirala – ch'ins po duvrar per quai.
Autur: Myriam Pelican mumma, pura e pedagoga curativa

Viver ensemen era sch'ins n'è betg dal medem avis

En mintga cas saja dentant da prender serius il virus. Damai ch'ils uffants èn bler tar tat e tatta fan els tests a chasa en cas da sintoms, di la dunna ch'abitescha a Surrein. Malgrà che la famiglia sa tegna vid las restricziuns e mesiras, han els era gia gì discussiuns cun persunas ch'han in'autra opiniun. Il mender sajan ils cumbats nua che l'opiniun da l'auter na vegnia betg acceptada. Per els èsi simplamain impurtant da sa decider per els e per lur agen corp. Myriam Pelican ha la speranza ch'ins possia viver ensemen ed in sper l'auter, era sch'ins n'ha betg la medema opiniun quai che pertutga la vaccinaziun ed il virus da corona.

RTR actualitad 07:00

Artitgels legids il pli savens

Scrollar a sanestra Scrollar a dretga