Siglir tar il cuntegn
cuntegn

Surselva «Urset lavunz» en Val Medel

En la Val Medel viva da nov er in «urset lavunz» – per tudestg in «Waschbär». L'animal è vegnì fotografà avant intgins dis d'ina trapla fotografica dal guardia-selvaschina Daniel Bundi.

L'urset lavunz curra tras il maletg.
Legenda: L'urset lavunz è i enla trapla – dentant be en quella fotografica dal guardia-selvaschina en Val Medel. mad

Sco quai ch'Arnold Caminada, il manader dal district da chatscha e pestga Surselva, ha ditg envers l'agentura da novitads rumantscha anr saja quai l'emprim mussament per in «urset lavunz» en Surselva.

Il guardia-selvaschina Daniel Bundi, ch’haja gia gì il cletg da pudair traplar il schacal mellen fotograficamain, haja betg sa smirveglià pauc, ha el ditg a l’anr:

Igl emprem haiel jeu tertgau che quei seigi ina sgnocca e haiel stuiu mirar duas ga. Mo igl ei veramein in uorset american. Quei ei naturalmein ina gronda casualitad.
Autur: Daniel Bundiguardia-selvaschina Val Medel

En il Grischun han ins gia vis in animal il 2011. Dasper in ch'era daventà l'unfrenda d'in accident sin l'autostrada datiers da Cuira avevan ins er pudì observar in en il Partenz. Indizis da l'urset che dastga vegnir sajettà durant la chatsch'auta datti però er en il Grischun central.

L’urset lavunz, che vegn er numnà urset american, è oriundamain propi da l’America. Avant radund 80 onns era el vegnì importà en Germania per la tratga da pellitscha. dad exemplars, ch’han pudì mitschar en libertad, èn els sa multiplitgads ed arrivads avant radund 26 onns er en Svizra.

RR novitads 17:00