Er per il president communal Dumeni Tomaschett èsi insatge fitg remartgabel. A Trun stoppia quai avair in bun clima per animals selvadis, els hajan gia lufs-tscherver ed in castur. El di ch’ins stoppia avair respect dad in urs e ch’el sez na veglia betg vesair quel.
Ina dunna ha manegià che l’urs saja gia puspè sur ils culms. In’autra ha ditg a RTR ch’ella avess respect sch’ella fiss ina giada en il guaud e stess avant l’urs.
I dat dentant era persunas che din ch’ellas n’hajan betg tema da quest animal. In um manegia ch’il luf disturbia el pli fitg che l’urs.
Anc betg prender mesiras
Il president communal Dumeni Tomaschett di che Trun na veglia anc betg prender mesiras cunter l’urs. La finala n’hajan ins betg chattà fastizs datiers da lieus abitads.
Dacurt aveva in guardiaselvaschina filmà quest urs cun ina camera automatica. Quai è stà en la regiun da Munt. Ins suppona che l'urs saja gia ì vinavant en direcziun da la Svizra Centrala.
RR actualitad 07:00