- La radunanza da delegads da l'Uniun grischuna da chatschaders da patenta ha votà unanim la parola NA pertutgant l'iniziativa che vul abolir la chatscha speziala.
- Tenor il president da l'uniun Robert Brunold è quai resultat in impurtant signal dals chatschaders en vista a la votaziun.
- Ils iniziants na vegnian dentant betg a retrair l'iniziativa pervia da quai cler resultat.
- Sur da l'iniziativa vegn votà favrer ni mars 2019.
Blers tschiervs malgrà dir enviern
Malgrà il dir enviern datti vinavant blers tschiervs en il chantun Grischun. Quai ha ditg l’inspectur da chatscha Adrian Arquint a la radunanza da delegads da l’Uniun grischuna dals chatschaders da patenta a Sursaissa. Tuttina conceda Arquint che blera selvaschina na saja betg vegnida tras l’enviern. Tut las cifras na sajan anc betg avant maun. Arquint è dapi radund 100 dis en uffizi.
Uss persvader la populaziun
Tuttina stoppia l'uniun intensivar la communicaziun ed infurmar meglier sur da la chatscha grischuna. Era sch'ils chatschaders e las chatschadras sajan per la chatscha supplementara, decider decidia la populaziun che na va betg a chatscha, manegia Robert Brunold. Perquai saja l'uniun vidlonder da planisar il cumbat politic e preparar ina seria d'acziuns per infurmar la populaziun sur da las consequenzas, sche l'iniziativa vegniss acceptada.
Cler NA, ma iniziativa na vegn betg retratga
Il votum da las delegadas ed ils delegads ha nagina influenza sin l'iniziativa, sco l'iniziant Christian Mathis declera. Il president central Robert Brunold aveva proponì ad el gist suenter il Na unanim, da respectar quella decisiun e retrair l'iniziativa. Uschia possia il comité da l'iniziativa gudagnar bler buna veglia tar chatschadras e chatschaders grischuns.
Ma per Christian Mathis na vegn quai betg en dumonda. Pli che 10'000 persunas hajan suttascrit l'iniziativa, e bleras da quellas giajan era a chatscha. Quai grond sustegn pretendia, che l'entira populaziun dal Grischun decidia sur da quella iniziativa.
RR novitads 06:00
