Siglir tar il cuntegn

Header

cuntegn

Ultimas cumpras Grond travasch avant ils dis da festa

Collavuraturas e collavuraturs da grondas stizuns sco Migros u Coop han da dar tut per ch’ils regals na sun betg vits. Colonnas avant la stizuns na hai ier però betg dà.

Il mainafatschenta da la filiala dal Migros a Glion, Bruno Manetsch, di ch’el haja stuì tschentar en students che gidian ad els durant il temp d’advent. Uschiglio na vegnissian els betg suenter cun la lavur en stizun.

Il december essan nus 30% sur l’onn passà. Las persunas ston sa nutrir, ils restaurants èn serrads e sch’els van sin pista ston els era prender cun sai insatge.
Autur: Bruno Manetsch mainafatschenta filiala Migros Glion
Tavla cun scret si Stop ni Go avant l'entrada.
Legenda: La tavla era l'entir temps sin «GO». Pia hai adina gì plaz avunda per tut la glieud. RTR, Ronja Muoth

Anc capacitad

La tavla avant l’entrada da la stizun che inditgescha sch'ins dastga entrar u betg è stada l’entir temp sin verd. Ils clients han pia dastgà entrar ed i n'ha dà nagina colonna. En stizun sez parevi però bain d'avair blera glieud.

Jau di sco igl è. Jau na vom betg gugent a cumprar en. Per mai è quai in stress.
Autur: Seniora indigena
Jau chat ch'igl è fitg stentus. Igl è fullanà plain glieud, quai fa mai tut confusa.
Autur: Giuvna matta indigena

Tar l’entrada avevi fitg bleras persunas. Ma sch’ins gieva pli lunsch viaden en la stizun sa reparteva la clientella spert ed ins ha gì plaz d’ir in sper l’auter ora.

Bunamain tut ils chars da cumprar en èn davent.
Legenda: Bunamain tut ils chars da cumprar en èn davent. RTR, Ronja Muoth

RTR actualitad 12:00

Artitgels legids il pli savens