Siglir tar il cuntegn
cuntegn

Surselva Ultim di da scola – nov'entschatta

En la pli gronda part dal chantun Grischun è oz l'ultim di da scola. Per intgins è quai er gist l'ultim di da la scola populara. Ils 9 onns da scola èn a fin ed i cumenza ina nov'etappa en lur vita. A Danis vala quai per 12 dals 39 scolars dal stgalim superiur da la vischnanca da Breil.

L'ultim onn da scola han 39 scolaras e scolars da l'entira vischnanca da Breil frequentà la scola secundara u reala a Danis. 12 d'els bandunan cun ils 30 da zercladur la scola. Els han terminà lur carriera da scola populara e fan uss il pass en la vita professiunala. Ils ins cumenzan gia glindesdi proxim, ils auters han anc intginas emnas vacanzas e cumenzan lura l'avust.

Clers plans per il futur

purtret da Svenia Tuor, ina scolara da la 9avla classa
Legenda: Svenia Tuor ha oz ses ultim di en la scola populara. RTR, Hugo Schär

Svenia Tuor da Breil è ina da questas scolaras che terminescha oz sia carriera en la scola populara. Ella ha gia clers plans per ses futur e va vinavant a scola. Ella va a Glion e fa la scola propedeutica e sa prepara uschia per la Scol'auta da pedagogia a Cuira. Sia finamira professiunala è da daventar magistra primara. Svenia ha apprezià cunzunt il bun spiert da cuminanza en sia classa ils ultims trais onns.

Nagins termins

Michael Friberg
Legenda: Michael Friberg. RTR, Hugo Schär

Er per Michael Friberg cumenza oz ina nov'etappa en sia vita. Suenter 44 onns magister en la vischnanca da Breil va el en pensiun. Per el va in temp professiunal intensiv a fin. Durant quests 44 onns è la scola sa sviluppada immens, uschia ha el ditg envers RTR. El sa legria ussa sin in temp senza termins e ch'el po planisar ses temp liber senza avair obligaziuns. Michael Friberg vul en spezial nizzegiar il temp per leger, viagiar, far viadis e sport.

RR actualitad 08:00