Siglir tar il cuntegn

Header

video
UKENIKE - in gieu da tavla sursilvan
Or da Battaporta dals 19.10.2018.
laschar ir. Durada: 3 minutas 37 Secundas.
cuntegn

Surselva «UKENIKE» – In gieu da tavla sursilvan

«UKENIKE» - «u che...ni che». Il num dal gieu è creativs uschia sco il gieu sez. Ils dus sursilvans Roman Flepp e Curdin Friberg han creà il gieu. Per finanziar lur project han els lantschà in project da «Crowdfunding».

Roman Flepp e Curdin Friberg èn ils chaus creativs davos il project da «UKENIKE». Il gieu che ha sias ragischs en la Rumantschia è en il mument fitg dumandà en l'internet. Gieus da tavla èn ozendi plitost or da la moda e vegnan remplazzads tras gieus da computers e consolas. La finamira dals dus sursilvans era da laschar reviver la fascinaziun davos ils gieus da tavla.

Insacura ha ins era avunda dal digital. I fa magari er bain da sa dar giu cun insatge simpel.
Autur: Roman Flepp inventader da UKENIKE
audio
Mezdi: «UKENIKE» – In gieu da da tavla sursilvan
ord Actualitad dals 19.10.2018.
laschar ir. Durada: 2 minutas 50 Secundas.

«UKENIKE» - u che... ni che...?

«UKENIKE» san ins dar cun dus fin quatter giugaders. «UKENIKE» è atgnamain in entir pachet da gieus perquai ch'ins sa dar il gieu en tschintg differentas modas e manieras. Uschia è la finamira era mintga giada in'autra. il focus dal gieu resta dentant adina il medem. Ins sto stuschar cun schlantsch ses craps pitschens encunter quels dal opponent.

L'acziun da «Crowdfunding» è in success

Blers onns eran Roman Flepp e Curdin Friberg stads adina puspè vid optimar il gieu. «Sch'ins mira sin ils emprims concepts dal gieu e cumparegliass els cun ussa. Lura è quai uss tut insatge auter», di Roman Flepp. Pass per pass han els sur onns creà in gieu, tochen ch'els èn decidids da lantschar ina campagna da «Crowdfunding». Immediatamain han els gì grond success. Sin la pagina d'internet kickstarter.com han els entaifer sis dis pudì rimnar 8'400 francs ch'els dovran per ch'il project gartegia. La glieud che sustegna lur project survegn per suenter ses agen exemplar dal gieu. Cunquai che la campagna terminescha pir en 18 dis, vegn la summa probablamain anc a crescher vinavant.

RR actualitad 12:00

Artitgels legids il pli savens