Siglir tar il cuntegn
Inhalt

Surselva Turtas giganticas da Vuorz

Avant in onn e mez ha Gabi Schwieger avert il Café dil vitg a Vuorz. La spezialitad èn turtas da groma el stil american.

Legende: Video «Café dil vitg» a Vuorz e sias turtas XXL abspielen. Laufzeit 02:05 Minuten.
Or da Telesguard dals 25.11.2015.

Suenter curt temps è il Café dil vitg gia fitg enconuschents en l’entira regiun. Il motiv èn las turtas da groma da Gabi Schwieger. Grondas turtas el stil american, ch’ella fa ord products indigens. Far turtas è la gronda passiun da la dunna da 46 onns. La turta cun mousse da tschigulatta saja sia turta preferida. Emprais quai ha ella da sia mamma. In emprendissadi sco conditra n’ha ella mai fatg.

Gastronomia el sang

Naschida è Gabi Schieger 1969 datiers da Berlin sco feglia d’in pur. Sper il puresser manavan ses geniturs anc ina pitschna ustaria ed ella haja passentà sia uffanza en quella ustaria. Ina lavur ch’ella haja charezzà. Perquai ha ella era fatg l’emprendissadi sco spezialista da restauraziun en in restaurant da 5 stailas a Berlin. Suenter igl emprendissadi è ella anc sa scolada vinavant ed ha cuntanschì differents diploms da hotellaria e turissem els roms marketing e vendita.

Dapi 2010 en Svizra

Igl onn 2010 sa è Gabi Schwieger decidida da emigrar en Svizra. Sco educatura suletta cun dus uffants vuleva ella porscher in meglier futur als uffants. Suenter ch’ella è stada in onn a Son Gagl, ha ella cumenzà ina plazza sco chef de rang en in hotel a Breil. Sin la stagiun d’enviern 2011/12 ha ella savì surprender la gestiun d’in restaurant en il territori da skis.

Gughegià il pass ella independenza

Suenter 3 onns ha ella gughegià da far il pass en l’independenza. Gabi Schieger ha fittà igl anteriur café Bertogg a Vuorz ed ha avert ses agen café, il “café dil vitg”. La strategia è simpla: crear in’atmosfera empernaivla e cordiala e lavurar cun products indigens. Quella strategia haja funcziunà davent da l’entschatta.