Siglir tar il cuntegn
Inhalt

Surselva Turistichers da la Surselva dian gea al Parc Adula

Dacurt èn turistichers da la Surselva s’inscuntrads cun represchentants dal Parc Adula. Sco ina retschertga da RTR mussa èn els (quels che dastgan prender posiziun) per il parc naziunal nov.

La Greina.
Legenda: La Greina. RTR

Quest parc fetschia senn turisticamain ed haja il potenzial da vender meglier la regiun, di il directur da Sedrun Mustér Turissem Hans-Kaspar Schwarzenbach. El na possia dentant betg dir con che la regiun da Mustér e Tujetsch profiteschia da quest project.

Gronda schanza per il turissem

Era Surselva turissem di gea al Parc Adula. Sco il mainafatschenta Roland Huber ha ditg ad RTR hajan els decidì a l’ultima sesida dal cussegl d’administraziun che quest parc saja ina gronda schanza per in svilup turistic bun, solid ed intelligent. El haja gia rimnà experientschas cun il parc naziunal svizzer, cura che el era directur a Scuol. Alura haja el emprendì con prezius ch’in tal parc naziunal saja sco product.
Era Sumvitg turissem ubain Viamala turissem (las vischnancas da Spleia, Nufenen e Valragn èn en il perimeter dal parc) sustegnan il Parc Adula.

Anc dumondas en connex cun la zona circumdanta

Ina organisaziun turistica che n’ha betg anc vulì prender posiziun è Visit Vals. Sco il president Moritz Schmid ha ditg, n'hajan els anc betg discutà quest tema en suprastanza. I dettia anc dumondas avertas en connex cun la zona circumdanta.