Siglir tar il cuntegn
cuntegn

Surselva Tujetsch: tuttina cuntinuar cun Sedrun Mustér Turissem

Tujetsch dat suenter al squitsch dal chantun ed è uss tuttina pronta da suttascriver ina cunvegna da prestaziun cun Sedrun Mustér Turissem.

Logo da Sedrun Mustér Turissem.
Legenda: Tujetsch duai tuttina esser part da Sedrun Mustér Turissem. RTR

Sco quai ch’il president da vischnanca da Tujetsch Beat Roeschlin ha ditg a Radiotelevisiun Svizra Rumantscha, na veglian ins tuttina betg terminar la collavuraziun cun Sedrun Mustér Turissem.

Il chantun vul la collavuraziun tranter Tujetsch e Mustér

La raschun per questa decisiun è ina brev dal Departament d’economia publica e fatgs socials dal Grischun. En questa brev punctuescha il schef dal departament, Jon Domenic Parolini, la necessitad stringenta d’ina collavuraziun aifer las 2 vischnancas. Las vischnancas duain lavurar vinavant sin basa da las cunvegnas da prestaziun vertentas e discutar las midadas necessarias. Ils purtaders da prestaziun na dastgian betg patir pervia da questas divergenzas.

I dovra ina persuna per intermediar

Jon Domenic Parolini propona ina persuna che moderescha tranter las vischnancas, l’organisaziun turistica ed auters partenaris e vul era sustegnair il process da sviluppar enavant la destinaziun.

Sco Beat Roeschlin di, mussia questa brev ch’il chantun haja era chapientscha per la vischnanca da Tujetsch. Ils 20 d’october sesa la suprastanza ensemen cun ina delegaziun dal departament d’economia per anc sclerir intgins puncts ord la brev, uschia Roeschlin. Ultra da quai veglian ins era vegnir ensemen cun la suprastanza da Mustér.