Siglir tar il cuntegn

Header

audio
Segunda ovra solara a Scharinas
Or da Actualitad dals 26.11.2022. Maletg: MAD
laschar ir. Durada: 3 minutas 53 Secundas.
cuntegn

Tujetsch Segunda ovra solara cun energia per 3’250 chasadas

La vischnanca da Tujetsch pudess daventar in nov center da la producziun d’electricitad solara. Uschia ha l’ovra electrica tuatschina, «l’Energia Alpina», preschentà in'ovra solara alpina che produciss electricitad per radund 3 ‘250 chasadas.

L’ovra solara Scharinas è ina ulteriura ovra solara en planisaziun en val Tujetsch. Quella giada vegniss ella dentant realisada da l’Energia Alpina, l’ovra electrica tuatschina e betg da l’Axpo, respectiv la CKW. Era saja l’entir territori da Scharinas en possess da la vischnanca da Tujetsch.

Planisà è ina ovra solara sin ina surfatscha da 100’000 meters quadrat, nua che rodund 22’000 panels solaras produceschan rodund 15,6 gigawatturas energia. Quai en cumparegliaziun cun l’ovra solara planisada en val Nalps in zic dapli energia. Ils panels solaras duajan avair dad omaduas varts la pussaivladad da prender si sulegl ed uschia da cunzunt l’enviern e cun naiv da producir anc dapli energia, uschia Ciril Deplazes, il mainafatschenta da l’Energia Alpina.

Ovra solara
Legenda: Visualisaziun da l'ovra solara. Energia Alpina

La planisaziun tecnica è quasi finida

Entaifer ina emna hajan ins realisà la planisaziun tecnica, uschia Ciril Deplazes. Quai saja era betg il pli cumplitgà, ma survegnir las lubientschas, lez process possia cuzzar pli ditg, uschia Deplazes. Ma tuts preschents èn s'exprimiss a moda positiva ch’ins chattia soluziuns, co lubir talas ovras, pertge là manca quai anc. Il chantun saja uss dumandà pertge lez surdat las lubientschas da construcziun, uschia Martin Cavegn il president communal. Perquai stoppia lez francar las cundiziuns da basa.

Ma tut fa prescha, pertge sin la fin dal 2025 sto l’ovra solara, ni almain ina part da l’ovra solara, esser vid la rait, uschiglio na datti nagins daners da la Confederaziun.

Artitgels legids il pli savens