Siglir tar il cuntegn
Inhalt

Surselva Tujetsch: Quint communal cun in gudogn da passa 190'000 francs

Il quint 2017 serra cun in gudogn da 192'409 francs. Quai tar expensas da 15'136'666 francs ed entradas da 15'329'076 francs.

La chasa communala a Sedrun
Legenda: La chasa communala a Sedrun. RTR

Il quint cuntegn deducziuns da la facultad finanziala ed administrativa da 4’639'157 francs. Il cashflow munta a 2’047’819 francs. Il cashflow saja sa reducì dapi 2014. La raschun principala è ch’il plazzal da la NEAT è vegnì terminà e consequentamain han las entradas da taglia mancà.

En il quint d’investiziuns sa resultan investiziuns nettas da 6’676’447 francs.

La facultad netta da la vischnanca da Tujetsch è sa sminuida da 10’773’706 sin 4’381’726 francs (- 60%). Ils daivets èn creschids davent da l’entschatta dal 2017 dad 1 a 3 milliuns francs.

Tegnair disciplina

Sco la suprastanza communala scriva en il messadi al cussegl da vischnanca saja quai impurtant ch’ins stoppia «tegnair ina disciplina tar las expensas e metter las dretgas prioritads tar l’elecziun e realisaziun dals projects. Plinavant sto la vischnanca - sin fundament da la situaziun finanziala - spargnar custs cun adattar las structuras nua che quai è pussaivel e necessari.»

Bogn Sedrun fa deficit

Il quint 2017 dal Bogn Sedrun mussa entradas da 576’792 francs ed expensas da 822’135 francs – quai che fa in deficit da manaschi da 245’343 francs.

Il cussegl da vischnanca da Tujetsch tracta il quint communal ed il quint dal Bogn Sedrun mesemna, ils 16 da matg 2018.

RR novitad 11:00