Siglir tar il cuntegn

Surselva Tujetsch: Plans per nova chasa da club da golf

La Plazza da golf Sedrun SA fa plans da far investiziuns a Selva, quai malgrà ch’ins na stat betg dal meglier cun las plazzas da golf en Surselva. L’idea è da bajegiar ina nova chasa dal club. Quella duai remplazzar il provisori che stat là gia dapi rodund 15 onns.

Plazza da Golf a Selva
Legenda: La chasa dal club (bajetg cun tetg rodund) duai vegnir remplazzada cun in nov en u sper il bajetg giusut il parcadi. RTR, G. Hosang

La chasa dal club ch’è in provisori ed è schizunt stà ina occasiun, saja vegnì in pau en ils onns, ha ditg il president da la Plaz da golf Sedrun SA, Daniel Gygli, a Radiotelevisiun Svizra Rumantscha. Ultra da quai porschia il bajetg existent memia pauc plaz e la cuschina saja en in container sper la chasa, quai che na saja era betg optimal. Perquai è vegnì elavurà 2 studis per ina nova chasa dal club.

In studi prevesa d’auzar la “Casa da golf”, il bajetg che cuntegn ils indrizs sanitars e stanzas per metter giud maun urden, ch’è in toc pli engiu. E l’auter studi prevesa da bajegiar la chasa dal club sper questa bajetg. Omaduas variantas hajan l’avantatg che la societad possia bajegiar sin agen terrain, di Daniel Gygli.

Finanziaziun sto esser segirada

Ils dus studis quintan cun 1 fin 1,5 milliuns francs per la nova chasa dal club. Sco Daniel Gygli di, vul el guardar cun il turissem, vischnancas, chantun ed autras organisaziuns da recaltgar ils daners necessaris. Sa chapescha ch’era ils commembers possian sa participar vid la finanziaziun. Quai na saja dentant betg obligatoric.

Daniel Gygli manegia ch’ins possia era reducir ils custs cun far lavur cumina e cun tschertgar partenaris tar fatschentas indigenas. En mintga cas vegnia pir bajegià cura che la finanziaziun saja segirada. Ussa vegnia sco emprim anc lavurà vid ils studis e lura fatg ina dumonda da bajegiar. A la radunanza generala dals acziunaris e dal club da golf vegnia lura infurmà co quai giaja vinavant, ha Daniel Gygli ditg.

RR Actualitad mezdi 11:00