Siglir tar il cuntegn

Header

video
Montar ina nova punt – betg chaussa da mintgadi
Or da Giuventetgna dals 20.05.2022.
laschar ir. Durada: 1 minuta 51 Secundas.
cuntegn

Tujetsch Montar ina nova punt – betg chaussa da mintgadi

La punt è vegnida construida surtut per colliar la via che vegn da Cungieri e las rutas da viandar cun la staziun a val da la pendiculara che va sin il Cuolm da Vi. Fin uss stuevan ins ir fin a la staziun e returnar puspè ensi per ir cun las pendicularas sin il culm. Surtut per velos, ma er per peduns era quai in viadi supplementar e stentus. Quel problem ha uss pudì vegnir schlià. La vischnanca da Tujetsch ha investì en la punt nova radund 420’000 francs.

 

Punt ord atschal da corten

La punt è construida ord in atschal spezial. Quel vegn lura cun il temp a far ruina ed uschia a furmar ina patina sin la surfatscha. Quella patina protegia lura er gist l’atschal, declera l’inschigner responsabel Ursin Venzin dal biro d’inschigniers Ipz. Endadens saja la punt cuverta cun lain laresch. Per els sco inschigners na saja quai betg ina lavur usitada. Planisar punts e montar ellas saja propi insatge spezial, di Ursin Venzin. Per vegnir da far quai hai duvrà gist duas cranas. Quai haja surtut da far cun il fatg che l’access al lieu saja difficil. Sur omaduas vias saja da sutpassar la lingia da viafier e quai haja dà difficultads. Perquai haja duvrà duas cranas e la montascha haja era per quest motiv stuì vegnir fatga sur la val. Normalmain vegnia l’entira punt montada e lura auzada al lieu, qua na saja quai betg stà pussaivel, uschia Ursin Venzin. Ma tut saja gartegià sin il millimeter e perquai sajan els fitg cuntents.

audio
Tujetsch: Punt da peduns per vegnir tar la pendiculara Cuolm da Vi
ord Actualitad dals 20.05.2022.
laschar ir. Durada: 2 minutas 7 Secundas.

RTR actualitad 08:00

Artitgels legids il pli savens