Siglir tar il cuntegn
cuntegn

Surselva Tujetsch: Infurmaziun davart la residenza da seniors

En il center da Sedrun duessi dar ina residenza da seniors cun 17 abitaziuns. Il president communal da Tujetsch, il president da la cumissiun da bajegiar e l’architect han dà pled e fatg ier saira.

La populaziun è vegnida infurmada davart il project ed era davart la finanziaziun. L’idea saja da bajegiar la residenza Dulezi per ch’ins possia abitar en Tujetsch uschè ditg sco pussaivel, ha il president communal Beat Roeschlin ditg. El è persvadì che Tujetsch dovria talas abitaziuns; e la dumonda persuenter vegnia anc a crescher.

Cuntents cun il project

Suenter la preschentaziun dal project han ils preschents pudì far dumondas. Mo sulet ina dunna ha vulì savair, pertge ch’i na dettia ina chaplutta en la residenza. L’architect Reto Schaufelbühl ha ditg che quai na saja stà previs. Sco intginas persunas han ditg venderdi saira ad RTR èn ellas cuntentas cun il project; e blers pudessan s’imaginar dad ir a star en la residenza da seniors.

Custs dad 8.36 milliuns francs

La residenza custa 8.36 milliuns francs (senza la cumpart da la Banca Raiffeisen). La vischnanca metta 3 milliuns a disposiziun (2.7 milliuns ord las reservas e 100’000 francs sco chapital d’aczias). Ils daivets muntan a 5.36 milliuns francs. Per che la nova societad, la Residenza Dulezi SA, possia profitar da cundiziuns favuraivlas da finanziaziun stat la vischnanca botta per quests emprests cun ina garanzia da banca. Per ils emprims diesch onns na sto la societad betg pajar in tschains sin il dretg da bajegiar. Plinavant vul la vischnanca surpigliar ils custs da 2.1 milliuns per la garascha inclusiv il conturn.

17 abitaziuns

Las 17 abitaziuns èn planisadas sin trais auzadas. I dat in local da cuminanza en l’emprima auzada ed en il plaunterren. Là datti era ina cafetaria ed ina filiala per la Banca Raiffeisen. Sche tut va sco previs è la residenza finida il december 2019.

RR actualitad 08:00