Siglir tar il cuntegn
cuntegn

Surselva Tujetsch: In cler gea a la pendiculara Salins – Cuolm da Vi

La radunanza communala da Tujetsch ha approvà il venderdi saira cleramain quest project. Ella ha concedì l’emprest da 2.5 milliuns francs per ils proxims 20 onns a las Pendicularas Mustér SA. La radunanza ha decidì cun 176 gea, ina persuna ha votà encunter ed ina è s’abstegnida da la vusch.

In stritg che mussa la lingia da la pendiculara.
Legenda: La lingia da la pendiculara da Salins a Cuolm da Vi. Uffizi federal per topografia

Plirs dretgs per total 625'000 francs

La radunanza communala ha era concedì differents dretgs, sco per exempel:

  • il dretg da traversar per il runal Cuolm da Vi – Parlets, ed il dretg da construir il runal e la staziun da partenza per ils proxims 50 onns, quai per in tschains annual da 940 francs.
  • il dretg da traversar per la pendiculara Salins/Sedrun – Cuolm da Vi, il dretg da construir pitgas ed il dretg d'utilisar la parcella nr. 2590 ils proxims 50 onns per in tschains annual da 4'260 francs.
  • il dretg da bajegiar sin la parcella nr. 3021 per ina surfatscha da 7'000 m² e per ils proxims 50 onns, e quai per in tschains annual da 7'000 francs.
  • il dretg da bajegiar sin la parcella nr. 3021 per ina surfatscha da 500 m² ils proxims 50 onns per in tschains annual da 300 francs.
Ina sala cun blers auditurs.
Legenda: Aspectaturs attents durant il pled da Beat Roeschlin. RTR, Hubert Giger

Il ristg per Tujetsch saja fitg modest

La suprastanza ha sustegnia cleramain il project: 176 han detg gea, ina persuna ha votà encunter ed ina è s’abstegnida da la vusch. Per la destinaziun turistica genereschia quel ina plivalur turistica. Questa purschida duai era attrair pli blers giasts durant la stagiun da stad.
Il ristg che la vischnanca da Tujetsch haja cun conceder ils differents dretgs e l’emprest da 2.5 milliuns francs saja fitg modest, ha la suprastanza scrit en il messadi. La vischnanca na stoppia betg sa participar vid ulteriurs custs da las Pendicularas Mustér SA.

Il plan da termins

L’entschatta d’avrigl 2018 cumenzan las emprimas lavurs da capomaister. A partir dal fanadur vegni fatg ulteriuras lavurs da construcziun. L’emprim onn da manaschi da la pendiculara è previs per la stagiun d’enviern 2018/19.
La stad 2018 vegn era inoltrada la dumonda da bajegiar per l’ustaria sin il Cuolm da Vi. La stad 2019 pon ins alura construir quella, ed era realisar il runal.

Custs da 24 milliuns francs

Las investiziuns per la pendiculara fan 16.5 milliuns francs. Ils custs cun pendiculara ed indrizs da far naiv muntan a ca. 24 milliuns francs.

L’emprest federal (cun ina garanzia da 2.5 milliuns da la vischnanca da Mustér) fa 5.7 milliuns francs; la contribuziun dal chantun Grischun a fond pers fa 1’140’000 francs; la contribuziun dal chantun per l’infrastructura turistica (a fond pers) fa 1’000’000 francs; l'emprest da la vischnanca da Tujetsch 2.5 milliuns; l'emprest da la vischnanca da Mustér 2.5 milliuns; il rest dals custs per la pendiculara e l’indriz d’ennavar surpiglian las Pendicularas Mustér SA.

Ed anc tut in'autra tractanda

Plinavant han votantas e votants da Tujetsch acceptà la lescha davart l’indemnisaziun da la vischnanca per sias prestaziuns en connex cun il provediment d’electricitad.

RR novitads 23:00