Siglir tar il cuntegn
Inhalt

Surselva Tujetsch: Cussegl da vischnanca di gea a la residenza da seniors

Il cussegl da vischnanca ha approvà unanimamain la fundaziun da la Residenza Dulezi SA e la finanziaziun persuenter. Questa fatschenta vegn anc suttamessa a la radunanza communala dals 23 da zercladur 2017.

Ina visualisaziun da la residenza
Legenda: Ina visualisaziun da la residenza Vischnanca da Tujetsch

La Residenza Dulezi SA è ina societad acziunara da caracter d’utilitad publica. Ella n'ha betg l’intent da far in gudogn. La finamira è da construir e da manar la residenza da seniors.

Vischnanca surpiglia la finanziaziun

La vischnanca vegn a fundar questa societad cun deponer in chapital d’aczias da 100’000 francs. Plinavant vegn la vischnanca a dar ina reserva da 2.9 milliuns francs. Per segirar cundiziuns optimalas da finanziar la residenza conceda la vischnanca ina garanzia per il chapital ester che resta. Plinavant conceda la vischnanca a la Residenza Dulezi SA il dretg da bajegiar per 50 onns. Per ils emprims diesch onns na sto la societad betg pajar tschains per il dretg da bajegiar.

Cura che la Residenza Dulezi SA vegn fundada surpiglia la vischnanca 100 % dal chapital d’aczias. Per segirar l’intent da la societad era en l’avegnir vul la vischnanca salvar ina quota minimala d’aczias da 95%. Sche la vischnanca preveda da vender in di aczias e sia cumpart vegn entras la vendita reducida sut 66.66%, alura sto ella avair il consentiment da la radunanza communala.

2.1 milliuns per la garascha ed il conturn

Il cussegl da vischnanca da Tujetsch ha era approvà in credit da 2.1 milliuns francs per construir la garascha ed il conturn da la residenza. Era questa fatschenta vegn suttamessa a la radunanza communala dals 23 da zercladur 2017.

RR novitads 10:00