Tujetsch ha desistì sin ina chasa da tgira e persuenter èn las trais vischnancas da la Sursassiala sa cunvegnidas da construir a Sedrun ina residenza da seniors. Il fatg ch’investiders privats vulan realisar sin terren da la vischnanca da Mustér ina surbajegiada cun l’intent sumegliant procura per malcuntentientscha en la vischnanca da Tujetsch.
Malsegirtad en Tujetsch
Sco il cusseglier da vischnanca da Tujetsch René Epp di regia ina malsegirtad. Tenor el fissi da sa tegnair vid la cunvegna e realisar sco emprim la residenza a Sedrun. Sch’i dovra lura anc vinavant talas abitaziuns, lura pon ins cuntinuar en etappas a realisar las abitaziuns a Mustér. Tenor René Epp n’ha la suprastanza da la vischnanca da Mustér betg reagì endretg. «Lezza fiss stada responsabla da far attent ils investiders privats sin la cunvegna» di Renè Epp. Ussa stoppia il cussegl da vischnanca da Mustér curreger quest sbagl e perquai haja il cussegl da vischnanca da Tujetsch inoltrà ina resoluziun per mauns dal cussegl da vischnanca da Mustér.
Prendì per conuschientscha
En la resoluziun supplitgescha il cussegl da vischnanca da Tujetsch da dar enavos la fatschenta a la suprastanza cun l’incarica da contractar cun la vischnanca da Tujetsch e tschertgar ina soluziun adattada ubain dar il dretg da bajegiar als investiders privats pir cura che la residenza a Sedrun è bajegiada. Il president dal cussegl da vischnanca da Mustér, Edgar Durschei, ha chapientscha per l’agir. «Mintga politicher stoppia sa metter en per sia vischnanca» di el. I saja dentant da far ina differenza tranter projects da privats e la politica di Edgar Durschei vinavant. Davart la collavuraziun tranter las duas vischnancas n’ha el anc vulì dir nagut.
Il cussegl da vischnanca tracta la fatschenta davart il surdar il dretg da bajegiar als investiders privats en il cussegl dals 27 da favrer 2015