Siglir tar il cuntegn

Header

Navigaziun

Era en l'avegnir mettan Mustér e Tujetsch a disposiziun almain 840'000 francs per Sedrun Mustér Turissem.
Legenda: Era en l'avegnir mettan Mustér e Tujetsch a disposiziun almain 840'000 francs per Sedrun Mustér Turissem. RTR, G. Hosang
cuntegn

Surselva Tujetsch: Be ina malchapientscha

Che la vischnanca da Tujetsch mettia l’auter onn 400'000 francs damain a disposiziun per l’organisaziun turistica Sedrun Mustér Turissem, saja ina malchapientscha. Quai communitgescha l'intermediatur André Gribi suenter l'inscunter da las vischnancas da Tujetsch, Mustér e Sedrun Mustér Turissem.

Tuts hajan decidì da lavurar communablamain vid il svilup turistic da la regiun, communitgescha il mediatur André Gribi suenter sia emprima s’entupada ier saira cun las vischnancas da Tujetsch, Mustér e Sedrun Mustér Turissem (SMT).

Vinavant almain 840’000 francs

La vischnanca da Tujetsch saja era pronta da metter a disposiziun almain 840’000 francs per l’organisaziun da turissem. I sa tractia d'ina malchapientscha che la vischnanca da Tujetsch haja gì en il preventiv 2016 mo la summa da 440'000 francs per l'organisaziun da turissem, uschia André Gribi. En il preventiv n'hajan betg tut ils daners figurà sut il medem punct. Il cussegl da vischnanca da Tujetsch ch'aveva refusà il preventiv or da quest motiv, tracta quel anc ina giada il december.

Plain speranza per ina buna collavuraziun

Cunquai che omaduas vischnancas pajan era l'auter onn mintgamai almain 840'000 francs a Sedrun Mustér Turissem, possia l'organisaziun da turissem far sia lavur e cunzunt era puspè porscher l'autra stad ina attractiva charta da giasts. Tenor André Gribi èn tut las partidas da buna fai che la collavuraziun funcziuneschi el futur.