Siglir tar il cuntegn

Header

cuntegn

Surselva Tujetsch avess plaschair da la pendiculara

La pendiculara che maina da Sedrun sin il Culm da Vi en il territori da skis da Mustér, che las Pendicularas Mustér vulan realisar, chatta buna accoglientscha en Tujetsch.

audio
Reacziuns positivas da Tujetsch
ord Actualitad dals 27.06.2015.
laschar ir. Durada: 3 minutas 22 Secundas.

Grond plaschair dal project per la nova pendiculara ch'avess era ina staziun a mez a Cungieri, ha Marcel Schmid. El è stà il president da la Pro Cungieri che vuleva salvar avant radund diesch onns la sutgera da Sedrun a Cungieri. «Mes cor ha gia adina battì per Cungieri» e perquai è Marcel Schmid da l’opiniun che sch’ins possia realisar quest project saja quel da sustegnair cun tut las pussaivladads che sajan avant maun. Uschia ponderescha Marcel Schmid era da laschar reviver la cuminanza d’interess Pro Cungieri che aveva passa 400 commembers.

Vischnanca sustegna project

Visualisaziun da la staziun a val.
Legenda: Visualisaziun da la staziun a val. mad

Sustegn datti era da la vischnanca da Tujetsch. Al president communal Beat Roeschlin èsi enconuschent ch’il Cungieri è in vegl giavisch dals tujetschins. Probabel vegni la vischnanca era a sustegnair il project finanzialmain. La vischnanca sezza stoppia dentant era far ponderaziuns co nizzegiar quai e tge ch’i vegnia purschì. Las Pendicularas Mustér han numnadamain mo planisà da porscher a Cungieri la pussaivladad dad entrar ed extrar da la pendiculara cun la speranza ch’insatgi privat haja l’iniziativa da far insatge a Cungieri. Predestinada fiss l’ustaria ch’è gia a Cungieri e che vegn actualmain duvrada mo privat. Il possessur André Maissen è pront da far la discussiun, sch’i dat interessents.

Anc prendì nagina posiziun

L’arena da skis Andermatt-Sedrun n’ha anc betg vulì prender posiziun. Sco il directur, Silvio Schmid ha ditg ad RTR n’enconuschian els anc betg il project en detagl. Sumegliant èsi era cun las organisaziun d’ambient. Era quellas na vulan betg prender posiziun avant ch’enconuscher ils detags.

Cungieri e sia istorgia

audio
L'istorgia da la sutgera Cungieri
ord Actualitad dals 27.06.2015.
laschar ir. Durada: 2 minutas 41 Secundas.

Dapi 2005 na datti betg pli sa sutgera da Cungieri. I sa tractava d’ina sutgera dad in ch’è vegnida bajegiada 1956 e vegniva duvrada l’enviern per skiunzs e pli tard per la via da scursalar e la stad per ir a viandar.

Artitgels legids il pli savens