Siglir tar il cuntegn
cuntegn

Surselva Tujetsch: 60’000 francs dapli ad onn per il Bogn Sedrun

Il cussegl da vischnanca da Tujetsch vul sustegnair il Bogn Sedrun. Quel na saja betg mo impurtant per Tujetsch, mabain per l’entira regiun.

Il Bogn Sedrun
Legenda: Il Bogn Sedrun RTR, H. Giger

Spargnar en auters lieus

Ils 60’000 francs ston ins dentant spargnar en auters lieus. Il cussegl da vischnanca ha stritgà 40’000 francs daners da marketing a la Andermatt Sedrun Sport SA. Pli pauc datti er per duas occurrenzas ils proxims trais onns: per ils dis da schlagher anc 65’000 enstagl da 70’000 francs e Pimp My Schlitten anc 50’000 enstagl da 65’000 francs ad onn.
Questa proposta è vegnida dal cusseglier René Epp. El fa valair che la vischnanca na duai betg far marketing, quai saja chaussa da Sedrun Mustér turissem.

200'000 francs per la Val Strem

Il cussegl da vischnanca da Tujetsch ha era concedì in credit da 200’000 francs per mesiras immediatas en la Val Strem. Il mars passà eran 220’000 m3 material vegnids giud il Cuolm da Vi e vevan chaschunà gronds donns.
Gea di il cussegl era alla cunvegna da prestaziun tranter Tujetsch e la regiun Surselva pertutgant il gimnasi da la claustra da Mustér. La cumpart da la vischnanca munta a 23’000 francs ad onn.

Gudogn da 167'000 francs

Plinavant ha il cussegl approvà il preventiv 2017. Quel serra cun entradas da 10’738’700 francs ed expensas da 10’571’750 francs cun in gudogn da quasi 167’000 francs. Il Bogn Sedrun quinta l’onn che vegn cun in deficit da 460’000 francs. Il deficit vegn a s’augmentar surtut pervia dals custs da mantegniment.
Il pe da taglia en la vischnanca da Tujetsch resta 2017 sin 95 % da la taglia chantunala simpla; il pe da taglia sin schaschom resta sin 1,5 ­‰.

RR novitads 06:00