La musica da tschaiver da Trun, Las Lieurs, han surpiglià dad organisar la radunanza da delegads da la Hefari, la Federaziun dal tschaiver svizzer, ch’è ils 2 e 3 d’october a Trun. «Nus avain ina giada vulì organisar ina occurrenza pli gronda ch’il tschaiver a Trun» declera la presidenta da Las Lieurs, Flurina Bundi, la motivaziun da surpigliar questa organisaziun. Spetgads vegnan fin 400 delegads dad uniuns, musicas e gruppas da tschaiver da l’entira Svizra. Per ils delegads datti er ina program da rom. Tranter auter pon ils delegads visitar fatschentas indigenas u contemplar la cultura e l’art da la regiun.
Anc plazs libers
Il punct culminant è la festa d’october da la sonda saira ch’è publica. A questa sa preschenta la furmaziun Oesch’s die Dritten. Tenor Flurina Bundi hajan ins gì da tschertgar ina furmaziun enconuschenta per pudair occupar ils var 1400 plazs en la tenda stgaudada sin plaz scola a Trun. «I ha dentant anc avunda plazs libers» di Flurina Bundi che spera da pudair vender tut ils plazs.
En tut quintan ils organisaturs cun custs da 135’000. Quests vegnan cuverts per part cun sponsurs e per part cun la vendita da bigliets e consumaziuns.