Siglir tar il cuntegn

Header

cuntegn

Surselva Trun: Nova purschida per giuventetgna

Ina giada per mais duai il «Monthly Event» avair lieu cun in program spezial per la giuventetgna a Trun en la Sala d’art.

Il post da lavur da giuventetgna Cadi ensemen cun il possessur da la Sala d’art a Trun, Luis Defuns duai vegnir organisà mintga emprima sonda dal mais ina occurrenza per giuvens e giuvnas ch’èn ord scola. Sco quai che Gabriela Cabalzar, dal post da lavur da giuventetgna, di duai la giuventetgna era avair la pussaivladad da restar da cumpagnia en la regiun en in local nua ch’ella è bainvegnida e ch’è era avert fin viaden en la notg.

Da tuttas sorts purschidas

audio
Mezdi: Nov project per la giuventetgna Cadi
ord Actualitad dals 03.03.2017.
laschar ir. Durada: 3 minutas 19 Secundas.

Il program da questas occurrenzas n’è anc betg fixà. Tenor Gabriela Cabalzar vulan ins era savair da la giuventetgna da tge ch’els vessan interess. Giuventetgna Cadi na possia betg sa prestar stars. I giaja plitost da laschar sa preschentar giuvens indigens. Saja quai cun musica ubain era cun insatge tut auter che divertescha e plascha a la giuventetgna.

Giuventetgna è bainvegnida

Las localitads metta Luis Defuns gugent a disposiziun per questas occurrenzas. El enconuschia la giuventetgna e chattia che quella saja super. Perquai sustegnia el gugent quest project. La finala decida dentant l’interess da la giuventetgna quant ditg ch’i vegn a dar la purschida.

L’emprima occurrenza ha lieu sonda ils 4.3.2017 a las 22.00 en la Sala d'art a Trun. Sco emprim vegn il project preschentà e suenter datti musica da DJ Wolfonics.

RR actualitad 11:00

Artitgels legids il pli savens