Siglir tar il cuntegn

Header

cuntegn

Surselva Trun: Casa Depuoz sa preschenta en nov vestgì

Quest center da scola, furmaziun ed integraziun ha uss ina nova pagina d’internet, in nov logo ed in nov slogan: abitar, viver, emprender, lavurar. Il logo è vegnì creà en trais colurs: verd, lila ed antracit.

La Casa Depuoz veglia ir cun il temp, ha il manader Matthias Gutmann detg ad RTR. Els sajan sa sviluppà enavant en la lavur sociala en scola e cun famiglias ubain cun recepir fugitivs minorens. Cun quest svilup hajan els era vulì midar il vestgì cun remplazzar il sistem vegl da la pagina d’internet e cun in nov logo che remplazza quel dal 2002.

L’entir process haja cuzzà 1 onn e mez, di Gutmann. 2016 hajan els realisà ch’els dovrian ina pagina d'internet nova, e plaun a plaun sajan anc autras ideas vegnidas vitiers.

Ina fatscha che surri

En egl dat il «z» dal nov logo per la Casa Depuoz. El vegn enramà dad ina fatscha che surri. Quai saja lur carta da visita per mussar il plaschair che regia tar els. Las trais colurs duain represchentar l’interpresa e sias valurs.

Il logo vegn sa chapescha era duvrà uss per correspundenza, palpiri da brevs, prospects ubain per la gasetta nova. Ed el è era integrà sin ils autos da la Casa Depuoz. Elavurà il concept ha l’interpresa communicaziun.ch cun Armin Spescha e Nadine Schöb.

RR novitads 06:00

Artitgels legids il pli savens