Siglir tar il cuntegn

Header

video
Il di suenter l'incendi a Trun
Or da Telesguard dals 20.02.2019.
laschar ir. Durada: 3 minutas 25 Secundas.
cuntegn

Surselva Trun: «Casa Carigiet» ha donn total

A Trun hai brischà en la chasa Carigiet, la chasa paterna da Alois e Zarli Carigiet. 10 persunas èn vegnidas evacuadas ord la chasa, naginas èn blessadas. Ils pumpiers han er pudì impedir ch'il fieu giaja sin il clavà ed ils bajetgs en il conturn.

Il suentermezdi curt avant las 16:00 ha la polizia chantunala survegnì l'alarm ch'i dettia fieu sin in lautget en ina chasa da pliras persunas a Trun. Il bajetg è datiers da la baselgia parochiala. Tar il bajetg ch'è brischà sa tracti da la chasa Carigiet, la chasa paterna da Zarli ed Alois Carigiet. La chasa datescha da l'onn 1769 e vala sco bajetg istoric a Trun.

Naginas persunas blessadas – donn total da la chasa

Tenor la Polizia chantunala sajan radund 10 persunas che sa chattavan en la chasa vegnidas evacuadas u hajan pudì bandunar sezzas quella. La situaziun saja stada bainprest sut controlla ed i dettia nagin privel per ils bajetgs en il conturn. La chasa na saja betg pli abitabla. Ils abitants hajan però chattà suttetg tar parents u en hotels.

audio
Bunura: A Trun cumenzan las investigaziuns suenter l'incendi
ord Actualitad dals 20.02.2019.
laschar ir. Durada: 2 minutas 1 Secunda.

I ha dà bler fim ord il tetg da la chasa. En acziun èn stads radund 70 pumpiers da Trun e Sumvitg sco er da Sursassiala. Lezs han stuì stgarpar davent parts dal tetg per pudair stizzar il fieu da surengiu. La notg è stada en funcziun ina guardia da fieu.

Il bajetg è donnegià totalmain. Las 2 auzadas sisum èn devastadas. Las auzadas suten hajan donns d'aua considerabels . Las raschuns per il fieu n'èn anc betg enconuschentas. Ils spezialists da la Polizia chantunala cumenzan las investigaziuns la mesemna bunura.

Il traffic da la via principala che maina gist dasper il lieu da l'incendi or vegn reglà entras ils pumpiers. Igl è però pussaivel da passar. Quai suenter che la via è stada serrada per pliras uras ed il traffic è vegni svià.

Alois Carigiet – Pictur ed artist

Avrir la box Serrar la box

Alois Carigiet è naschì ils 30 d’avust 1902 a Trun. El è creschì si en la chasa Carigiet sper la baselgia parochiala sco 7avel dad 11 uffants. La famiglia Carigiet ha bandunà Trun, cura che Alois era 9 onns ed è ida a Cuira. Sco illustratur dal cudesch d’uffants «L'Uorsin da la plumpa» è Alois Carigiet daventà enconuschents sin l’entir mund. Dapi il 1945 fascinescha il buob grischun cun chapitscha a barlocca pign e grond enturn il globus. Il cudesch è vegnì translatà en 14 linguas e vendì passa dus milliuns giadas.

Guido Carigiet e Carli Albin sa regordan da la «Casa Carigiet» dal temp ch'els en creschids là.

audio
Bunura: Il passà da la chasa arsa a Trun cun 2 ch'èn creschids là
ord Actualitad dals 21.02.2019.
laschar ir. Durada: 1 minuta 46 Secundas.

RR novitads 17:00 ++

Artitgels legids il pli savens