Betg restar cun il chapital sin nulla
Els hajan gì la chaschun da cumprar ina buna occasiun, di il cassier da l’uniun Donat Albin. Il chapital da l’uniun avess quasi tanschia per finanziar la maschina. Mo alura fissan els cun il chapital sin nulla e la consequenza fiss, ch’els na pudessan betg pli mantegnair il manaschi da la plazza da glatsch. Perquai spera Donat Albin ch’els possian rimnar ina buna summa da sponsurs e donaturs, surtut era perquai ch’els hajan ils proxims onns autas investiziuns a Pustget.
20'000 francs per l'infrastructura
Per mantegnair l’infrastructura stoppian els impunder 20’000 francs ad onn. E perquai stoppian els tschertgar uss sponsurs e donaturs. Ma els stoppian era sezs empruvar da rimnar daners, p.ex. cun ina saira da famiglia en il center communal a Trun (13.01.2017) ni era cun ina 'Disco on ice' sin il glatsch a Pustget (14.01.2017).
Reclama per las set plazzas da glatsch
Ir cun patinas para d'esser ina alternativa al ir cun skis ubain al pass lung. L’onn passà tranter Nadal e Bumaun hajan els vis blers turists ed indigens ch’eran anc mai stads sin la plazza da glatsch. Els sajan era leds, sche las organisaziuns da turissem fetschian reclama per questa purschida.
E quai fa Surselva turissem, sco la responsabla per las medias Claudia Meyer ha ditg ad RTR.
Las set plazzas da glatsch sut lur tetg figureschian sco offertas generalas (sco p.ex. sendas dad ir cun scarsolas ubain turas cun gianellas). Surtut famiglias apprezieschian l’offerta da plazzas da glatsch.
Ord l'archiv
RR actualitad 11:00