Siglir tar il cuntegn

Header

Navigaziun

Il vitg da Trin il 2004. Dapi l'ura è vegni bajegià bler en la vischnanca.
Legenda: Il vitg da Trin il 2004. Dapi l'ura è vegni bajegià bler en la vischnanca. Keystone
cuntegn

Surselva Trin quinta cun ina pitschna perdita per il 2017

A Trin ha a la radunanza communala approvà il budget per il 2017. Quel serra cun in deficit da 140’000 francs tar expensas ed entradas da radund 7 milliuns francs. Era lascha la vischnanca il pe da taglia sin 100% da la taglia chantunala simpla.

Las votantas ed ils votants da la vischnanca da Trin han ultra da quai concedì ier saira differents credits. Uschia han els approvà il credit da 250’000 francs per il project d’in nov lavuratori forestal. Quai en connex cun la fusiun gia decidida dals uffizis forestals da las duas vischnancas Trin e Flem.

Il project d'engrondir il manaschi forestal fusiunà cun la vischnanca da Flem.
Legenda: Il project d'engrondir il manaschi forestal fusiunà cun la vischnanca da Flem. mad

Era per 250’000 francs vul la vischnanca sanar la tschiffada d’aua Turnigla da l’ovra a Trin Mulin. Quella è vegnida construida il 1906 ed pliras giadas renovada. La gronda part da la tschiffada è sutteran.

La tschiffada da Turnigla construida il 1906.
Legenda: La tschiffada da Turnigla construida il 1906. mad

Viver a Trin

Sco la vischnanca da Trin scriva è grazia al lieu favuraivel datiers da la chapitala Cuira ed il territori da skis Flem Laax Falera il futur da la vischnanca garantì. Uschia sajan bleras persunas interessadas da vegnir ad abitar a Trin, scriva la vischnanca. Gist ord quest motiv stoppia il center dal vitg restar attractivas. Averta restia la dumonda da la nova plazza communala. Las contractivas cun ils possessurs vegnian el decurs da quest enviern cuntinuadas, scrivan ils responsabels da la vischnanca Trin.

Trin venda parcella per dubel da la valita

Era ha la radunanza communala decis da vender la parcella Platta per 255’000 francs. La parcella cun l’edifizi ha ina valita uffiziala da 101’000 francs. 11 offertas èn vegnidas inoltradas a la vischnanca. La pli bassa era tar 40’000 francs, la pli auta tar 255’000 francs. Sco la vischnanca scriva veglian ils possessurs novs in pèr marida pli giuven prender dimora en questas chasa cura ch’ella è alura renovada. Quai saja era il giavisch da la vischnanca.

RR novitads 06:00