Siglir tar il cuntegn

Header

cuntegn

Tranter gust e frust «Jau crai ch'igl è propi il regl da dar in gieu...»

Ins pudess pensar che las sairas da lotto sajan plitost insatge vegl e lur temp in zic passà. Ma anc adina attiran ellas atun per atun tschients da giugaders en las salas da gimnastica da la Surselva. Sco per exempel il lotto organisà da l'Uniun da pestgaders da Sagogn.

Sin tribuna da las halla da scola a Sagogn sa preschentan ils premis en la glisch dals reflecturs: In tablet, divers chanasters, buttiglias vin, magnuccas ed anc bler auter. Schambuns, satgados ed in segarievens pendan schizunt giu dal palantschieu sura.

Ils premis èn in bonus, ma principalmain vai per giugar e per il regl. E sch'ins gudogna insatge han ins natiralmain era anc plaschair londervi.
Autur: Ursin Derungsgiugadur passiunà oriund da Vignogn

En halla han ils pestgaders mess ora per lung maisas e sutgas per bun 200 persunas. E malgrà che la cassa fiss atgnamain averta pir a partir da las 19:00 uras èn blers fans e rutinads gia vegnids avant. Uschia che la halla è bain emplenida gia curt suenter las set.

Jau n'avess betg pensà che gist tants vegnian e che quai emplainia l'entira halla...
Autur: Fabio Caprezper l'emprima giada ad in lotto

Tipic lotto: baterlim e ruaus sa barattan

Il tact da la saira dattan ils dus pestgaders che sesan sin tribuna. Relativamain spert tira in dad els in cifra ord in satget e l'auter cloma ora ella. Ina suenter l'autra fin ch'insatgi cloma «Lotto!» nà da la sala. Igl è da tadlar bain per ch'ins na manchentia betg ina cifra... e gea betg disturbar il vischin u la vischina.

N'è in lotto per ina giada betg valaivel, chaschuna quai bain inqual chau cotschen ed in u l'auter nausch commentari.

Lotto?

Personen-Box aufklappenPersonen-Box zuklappen
chartas da lotto cun chips
Legenda:Las chartas da la saira da lotto a SagognRTR, Gion Gieri Flepp

Il gieu e simpel: Mintga giugader po cumprar in set chartas (pli bleras u pli paucas tenor giavisch e purschida). Mintga charta cuntegn trais lingias cun mintgamai tschintg cifras per linga. Quellas èn tranter in e novanta.

Davantvart vegnan las cifras tratgas ora e mintgin che ha la cifra correspundenta sin ina da sias chartas po cuvrir quella. «Lotto» datti mintgamai per ina lingia cuvrida, per duas e per l'entira charta.

A Sagogn cun premis en la valita da fin 120 francs per ina lingia, fin 150 francs per duas lingias e fin 240 francs per l'entira charta. Quai repartì sin 16 rundas normalas e 4 supplementaras.

Be dal cletg na sa fidan ils «profis» betg

Antonia Tschuor da Sursaissa è ina giugadra passiunada. Ella na manchenta dapi 30 onns quasi nagin lotto en Surselva. E sco «profi» ha ella natiralmain era sias atgnas chartas. Chartas che cuntegnan intginas cifras pliras giadas. Fin ussa haja ella fatg bunas experientschas cun quella tactica.

Avant 30 onns vegnivan anc vendidas be chartas singulas. Lura na devi anc betg las chartas da la saira e quai gieva magari fin las trais la bun'ura.
Autur: Antonia Tschuorgiugadra passiunada da Sursaissa

Sumegliant guarda quai ora tar ils dus collegas lumnezians Ursin Derungs e Marco Lechmann. Els n'èn anc betg uschè ditg da la partida sco Antonia Tschuor, ma era giugaders passiunads. Cun atgnas chartas che almain Ursin Derungs mida ora da pausa perquai ch'el n'ha betg tratg in premi.

Ins sto far gugent quai. Igl è bain lung sch'ins è qua quatter uras vid metter si quels chips.
Autur: Marco Lechmanngiugader passiunà da Vella

Premis n'èn betg igl A ed O

Blers, tant rutinads sco entschaviders, fan valair ch'i na giaja ad els betg exnum per ils premis. Cler saja bel sch'ins gudognia insatge, ma il pli impurtant saja il giugar, la cumpagnia ed era il sustegnair las uniuns. E tuttina sch'ins giaja cun nagut a chasa u haja pliras giadas manchentà be per pauc in premi, saja quai bain in frust. Cuntrari dettia in gudogn puspè regl dad er visitar il proxim lotto.

Il pli grond premi che jau hai gudagnà ina giada è stà in pèr skis... il principal è da sa participar, gudagnar è lura secundar.
Autur: Marco Lechmanngioga gia dapi 20 onns lotto

Ursin Derungs è dal reminent ì a chasa cun ina lantscha da pestgar e Marco Lechmann cun in tablet.

Ord l'archiv

Video
Il regl da dar lotto – Cuntrasts dals 28-01-2001
Or da RTR dals 28.01.2001.
laschar ir

RR actualitad 07:00