Siglir tar il cuntegn
cuntegn

Surselva Transportar mangiativas cun lamas sin la chamona da Medel

Trais partenaris vulan lantschar in project communabel : L’hotel medelina a Curaglia, la chamona da Medel ed Amarenda/ Lamaventura. Lamas duain transportar vivonda sin la chamona da Medel (2524 m).

In trekking en la regiun
Legenda: In trekking en la regiun MAD

Per regla giajan els cun 6 animals, di David Deplazes da Surrein. In lama possia purtar ca. 20 kg e la rauba vegnia repartida mez e mez en tastgas da mintga vart. David e sia dunna Nadja han in tratga da lamas.

Forsa sminuir ils sgols cun l'helicopter

La finamira saja da transportar products frestgs da la regiun, per exempel salata e verduras, di David Deplazes. Ma tut la rauba che la chamona dovra na pon ils lamas betg transportar – per exempel buttiglias da gas. Quellas vegnan sguladas siadora cun helicopter. Cun far transports cun lamas pon ins forsa sminuir ils sgols, e quai fiss in fitg bel effect. I dependia la finala, quantas persunas che fetschian part da quest trekking e con savens ch’els giajan.

Il transport cun ils giasts dal hotel medelina cumenza a Curaglia. Ils lamas spetgan sper la punt da Pardatsch in toc sur Curaglia. Il viadi cuzza circa tschintg uras.

Cuschinar cun products regiunals

L’idea da far tals transports saja vegnida en in discurs tranter els dal hotel medelina ed ils manaders da la chamona da Medel. La finala hajan els era discutà cun David e Nadja Deplazes, di Rico Tuor, il president dal cussegl d’administraziun da la medelina SA. La cuschina da la chamona e quella dal medelina hajan ina filosofia sumeglianta, vul dir: ins emprova da cuschinar cun ils products regiunals da la stagiun ina spaisa adattada.

Il trekking cun lamas ( 1 ubain 2 dis) pon ins cudeschar tar l’hotel medelina.

RR actualitad 08:00