Trais centers regiunals per il Parc Adula

Trais ubain in center per il Parc Adula? Cun questa dumonda sajan ils responsabels dal parc era sa fatschentads, di Rico Tuor, il manader da projects per il svilup regiunal.

La Greina che è era en il perimeter dal Parc Adula.

Legenda da maletgs: La Greina che è era en il perimeter dal Parc Adula. Parc Adula

La finala sajan els sa decidids da crear trais centers regiunals. Il motiv è ch’il parc saja fitg grond cun trais regiuns linguisticas. Perquai saja quai stà ina decisiun politica, era da reparter las plazzas.

Las funcziuns/tematicas èn repartidas sco suonda:
En in center (ad Olivone) vegn la scienza, in auter tracta il tema da la zona da coc, protecziun da la natira e label, ed il terz sa fatschenta cun il turissem, svilup regiunal e cultura. Nua che quests dus vegnan n'è betg anc decidì.

Avantatgs e dischavantatgs

Ils avantatgs da trais centers è ch’ins vegnia da lavurar pli intensiv en las regiuns differentas e ch’ins possia reparter meglier tematicas e funcziuns. In dals dischavantatgs po esser ch’i saja ina sfida da lavurar ensemen e dad esser trasora al current tgi che fetschia tge, uschia Rico Tuor.
Sper ils trais centers regiunals datti era biros d’infurmaziun per visitaders ed indigens e posts externs per il svilup regiunal. En tut èsi previs da stgaffir 18 plazzas.