Siglir tar il cuntegn

Surselva Theo Candinas: «Jeu sun naschì poet»

El è vegnì enconuschent surtut cun sias ovras «Gion Barlac», «Historias dil Parler Pign ed autras bialas» ubain «Maria Madleina». Dacurt ha il scriptur da Surrein publitgà ses cudesch da poesias «Rendida dil sulegl / Sonnenuntergang»

Il nov cudesch da Theo Candinas.
Legenda: Il nov cudesch da Theo Candinas. RTR, H. Giger

I sa tracta d’in cudesch da 140 paginas cun passa 100 poesias. In dals temas centrals è la mort. Il december 2014 è l’autur stat en l’ospital. La poesia «Viseta» cumenza cun ils vers:

Uss eis ella puspei stada cheu, / ha dau is e spluntau ualti ferm …
Autur: Theo CandinasViseta

Sper la vart contemplativa e meditativa ha l’autur era ina avaina satirica ch’ins chatta en intginas da sias poesias.

Ils ultims onns ha Theo Candinas publitgà pliras ovras en tudestg ubain rumantsch e tudestg (p.ex. 2010 il cudesch da poesias «Raccolta tardiva/Spätlese».

Candinas ha 85 onns. Co el di, veglia el scriver vinavant. E sin la dumonda daco, respunda el cun la poesia «Per miu 85avel natalezi»: Jeu vivel aunc / e pos trer flad / per viver. / E per trer flad / stoi jeu gie scriver / Cal’jeu in di da scriver, / disdesch’il flad / ed jeu stoi / prest murir.