Siglir tar il cuntegn
cuntegn

Surselva Tgi va en l'elecziun cumplementara per la Lumnezia

La Lumnezia sto anc eleger in deputà, perquai che Marcus Caduff è elegì sco cusseglier guvernativ.

Curdin Capeder e Stefan Schmid ils suppleants elegids.
Legenda: Curdin Capeder e Stefan Schmid han anc betg decidì sch'els candideschan. RTR, Linus Livers

Cun quai che Marcus Caduff è elegì sco cusseglier guvernativ dal Grischun, sto el desister sin ses mandat da deputà, nua ch'el è medemamain elegì. Quai pretenda in'elecziun cumplementara per eleger il segund deputà da la Lumnezia. La lescha vertenta che reglescha las elecziuns di, «Sche ina persuna elegida desista da ses sez, sto il post che vegn libers, vegnir occupà entras ina elecziun cumplementara.»

Curdin Capeder è elegì sco emprim suppleant per la Lumnezia, el enconuscheva questa regla. L'onn 2014 aveva Jon Domenic Parolini medemamain desistì da ses post e chaschunà in'elecziun cumplementara. Per blers en Lumnezia è questa regla insatge nov, els avevan pensà che l'emprim suppleant ruschnia automaticamain suenter en il post da deputà.

Ils suppleants sco candidats

Per l'elecziun cumplementara n'èsi anc betg cler, tgi che candidescha. Dals dus suppleants Curdin Capeder da Cumbel e Stefan Schmid da Val èsi stà d’udir ch’els pondereschian anc. Sch’i dat perfin in terz candidat n'è betg cler. L'elecziun cumplementara ha lieu dumengia il prim da fanadur, ha comminitgà la regiun Surelva.

RR actualitad 12:00