Siglir tar il cuntegn
Inhalt

Surselva Tenda si - manescha libra

Il circus Nock è a Glion. Ils lavurants ed artists sa preparan per l'emprima producziun da questa saira. Quai vul dir: Metter si la tenda, drizzar en ella, trenar in zic ubain gudair il temp liber. Ed ils animals giaudan il pastg alpin savurus.

Legende: Video Circus Nock a Glion abspielen. Laufzeit 00:32 Minuten.
Or da RTR dals 15.08.2016.

Gia a las set la damaun han ils lavurants dal circus Nock cumenzà a metter si la tenda gronda. Quai dovra temp e coordinaziun. Otg persunas fan quai mintga giada. Ed è la tenda ina giada fixa, è ella propi fixa. Lura po quai plover ubain suflar - la tenda stat. Ella vegn sin il pli in zic bletscha. Auter è quai dentant sch'igl ha pluvì ditg avant - di Alexandro, il maister da la tenda. Lura na tegnan las francadas betg en la terra bletscha.

Ils artists fan pausa

Durant che la tenda vegn bajegiada si han ils artists in zic pausa. Els han lungs dis da lavur enfin mesanotg. E sche la producziun è pir la saira nizzegian blers artist la pussaivladad da visitar ils vitgs nua ch'els èn ubain da far ina spassegiada. Insaquants treneschan era. Perquai che fit ston els adina esser - er sch'els han per exempel dafraid.

Ils animals survegnan in curtin là nua ch'els en. Qua en il Grischun saja quai bi da laschar ordadora ils animals ed i na dettia era nagins problems. En citads saja quai pli grev, di la plidadra da medias. Il circus Nock ha chavals, camels, lamas ed in zebra pensiunà.

Il zebra pensiunà

Il zebra dal Nock è il sulet da sia muaglia che viva anc. E perquai che l'animal è uss uschè disà en il circus, na pon ins betg simplamain laschar a chasa el. Perquai va il zebra anc adina sin turnea cun il circus Nock, er sch'el n’è gia daditg betg pli en la manescha.