Siglir tar il cuntegn
Inhalt

Surselva Tat e tatta han persequità cun tensiun ils cumbats dal biadi

Era a Disla sut Mustér è la fin d’emna la lutga federala stada trumf. Il tat e la tatta dad Armon Orlik han persequità cun tensiun la prestaziun dal biadi.

Il tat e la tatta dad Armon Orlik
Legenda: Plain tensiun han il tat e la tatta dad Armon Orlik persequità la fin d'emna ils cumbats da lur biadis Armon e Curdin. RTR, Gian Carlo Candinas

«Sche Armon gudagnass in cranz fiss quai super». Da quest maini èn il tat sco era la tatta. Impurtant saja dentant era ch’i dettia naginas blessuras, agiunta la tatta.

Il tat è il ruassaivel, la tatta mussa emoziuns

Durant ils cumbats dad Armon Orlik ves'ins en stiva dal tat e la tatta dus differents tips da fans.

La tatta ha adina fatg dapli quitads per ses buobs.
Autur: Gieri OrlikTat dad Armon Orlik

Il tat guarda las lutgas cun tensiun, dentant a moda ruassaivla. Tranteren datti era in'analisa da la prestaziun. La tatta perencunter mussa sia gnervusitad. Tar mintg’acziun dal biadi datti reacziuns emoziunalas da la tatta. Tar tschertas acziuns sa tschentan perfin ils mauns avant fatscha.

«La tatta ha adina fatg dapli quitads per ses buobs», di il tat cun in surrir en fatscha.

Mintgin reagescha auter sin victoria dal biadi

En l’emprima lutga metta Armon Orlik en dies Kilian Wenger. La tatta dat ina givlada ed ina sblatschada. Il tat sesa sin sia sutga e mussa cun in surrir ch’el è losch sin il biadi. «Classa». Cun quest pled descriva el la prestaziun en quest emprim cumbat.

Stiva plaina durant lutga finala

La dumengia è la tensiun anc stada ina giada pli gronda en stiva da Gieri e Luisa Orlik a Disla. Durant la lutga finala dad Armon cunter Matthias Glarner hani anc gì visitas d’intgins parents. Ensemen èsi lura vegni patir durant la lutga.

Mes puls è sin 200.
Autur: Toni OrlikAug dad Armon Orlik

Malgrà ch’i ha dà ina terrada èn questa lutga finala è bainspert la luschezza stada avant maun. E la fin finala èsi vegni fatg viva sin la prestaziun dad Armon.

RR actualitad 07:00