Siglir tar il cuntegn

Header

audio
Toni Vinzens è il nov president
Or da Actualitad dals 23.06.2022.
laschar ir. Durada: 3 minutas 38 Secundas.
cuntegn

«Surselva Romontscha» Toni Vinzens: «Igl è gronds fastizs, però jau ma legrel»

Toni Vinzens (30) stat a Rueun ed è da nov al timun da l'uniun «Surselva Romontscha». El è oriund da Sagogn e scolast al gimnasi da la claustra a Mustér. Vinzens ha studegià latin, talian e grec vegl a Turitg sco er a Pisa. A la scola claustrala instruescha el latin e talian.

Chattar president è ina sfida

Chattar in president per ina uniun è ina sfida. Per la «Surselva Romontscha» era quai era tuttina. Uschia han la finala ils contacts persunals da l’anteriur president Alberto Palaia manà tar il nov president. Sco Toni Vinzens di saja la discussiun vegnida si durant in gentar en la mensa da la scola claustrala e suenter ina emna temp da ponderaziun saja el sa decis da s’engaschar, era sch’el na savevi betg propi tge che spetga. Ma cun l’engaschi da l’entira suprastanza che sa cumponi da persunas giuvnas e veglias, possian ins realisar las sfidas che spetgian, uschia Vinzens. Ma ina autra sfida saja da vegnir tar dapli commembras e commembers era giuvens e da far pli visibla la lavur da la «Surselva Romontscha» ils proxims onns.

Calender Romontsch dat blera lavur

Il mument dat blera lavur il «Calender Romontsch». Quai suenter che la redactura Lisa Schmidt-Candinas ha demissiunà e che la chasa editura Somedia n'ha betg chattà ina successura u successur. Surtut la lavur da curreger e leger tut saja fitg intensiva, ma el possia sa fidar sin il sustegn da Lisa Schmidt-Candinas e da Martin Cablazar, sco era da ses antecesur. Suenter quai onn vegnan ins a decider co vinavant, uschia Toni Vinzens.

Alberto Palaia è sa retratg sco president pervia da sia nova sfida professiunala. El era vegnì elegì sco delegà per il Post spezialisà per la plurilinguitad. Alberto Palaia è stà nov onns en la suprastanza – trais da quels sco president.

RTR actualitad 11:00

Artitgels legids il pli savens