Siglir tar il cuntegn

Surselva Surselva: 6 recurs en connex cun rumir naiv

Mintga 10 onns fa il chantun respectiv l’uffizi da construcziun bassa contracts per rumir naiv. La gronda part da questas lavurs vegn surdada a firmas da transport e be intginas paucas a purs.

Lavurs da rumir la naiv.
Legenda: Lavurs da rumir la naiv. RTR

Schliaziuns favuraivlas

Avant che surdar las lavurs da rumir naiv sin las vias chantunalas examinescha il chantun il plan da vias. I possia esser ch’il chantun haja surpiglià vias da colliaziun d'ina vischnanca ubain ch’ina via saja vegnida schlargiada e ch’ins po duvrar vehichels pli gronds e pli grevs, di Reto Knuchel da l’Uffizi da construcziun bassa dal Grischun. Il chantun veglia era optimar il manaschi, vul dir: els publitgeschan lavurs ch’els faschevan sez fin uss ubain ch’els fan sez tschertas lavurs. La finamira saja da guardar tge schliaziun ch'è la pli favuraivla.

Il pretsch è in criteri impurtant per decider tgi che survegn tge lavur. I dat però er auters criteris, sco per exempel ils aspects ecologics ubain aspects da qualificaziun e da la tecnica e dumondas sco: Ha in offrider ina garascha?

Gronda concurrenza

L’Uffizi da construcziun bassa ha publitgà 128 lavurs per l’entir chantun. 31 lavurs van en Surselva. I sa tracta da lavurs impurtantas per ils interprendiders da transport. Quai di Marcel Capeder da la firma MC Transports SA a Degen-Rampa. La concurrenza saja fitg gronda, perquai ch’ils offriders veglian occupar lur lavurers l’enviern. Els hajan fatg quatter offerts e survegnì da far duas lavurs. Cun quellas duas incumbensas e cun otg autras lavurs da rumir naiv per vischnancas hajan els 10 plazzas segiras per l’enviern, di Marcel Capeder. En Surselva hai dà sis recurs (13 recurs en l'entir Grischun).

Dependents da questas lavurs

L’interprendider da la Lumenzia chapescha ch’i ha dà recurs. En sias offertas haja el pers ina via ch’el ha fatg passa 40 onns. Sch’el avess stuì avair questa via, avess el era fatg recurs. Mo perquai ch’els hajan avunda lavur n'hajan els betg inoltrà in recurs cunter la decisiun.

Fin uss n'èsi betg anc decidì, tgi che survegn las vias ch'èn pertutgadas dals recurs. Ussa sa fatschenta la Dretgira administrativa cun las dumondas da rumir naiv sin las vias chantunalas.

RR actualitad 12:00