Siglir tar il cuntegn

Header

cuntegn

Sursaissa Pli paucs visitaders ch'auters onns a l'opera viva

Las producziuns da l’opera viva a Sursaissa èn idas a fin la dumengia. Radund 4'000 persunas han visità la producziun da «Semiramide», quai suenter ch'ella ha stuì vegnir spustada pliras giadas.

Radund 4'000 persunas, quai saja bun, ma betg fitg bun. Questa bilantscha fa il president dal comité d’organisaziun Claudio Pfister. En cumparegliaziun cun la media dals ultims onns saja quai 10-15% sut la media. Il comité d’organisaziun vul uss examinar ils motivs. L’opera Viva vegnia segir puspè organisada, sche quai saja il cas mintga dus onns, sco usità na saja anc betg cler, uschia Claudio Pfister envers RTR.

audio
Raschuns per pli paucs visitaders 2022
ord Actualitad dals 16.08.2022.
laschar ir. Durada: 2 minutas 27 Secundas.

Nov producziuns da «Semiramide» 

En l'opera da Gioachino Rossini tissienta Semiramide, la regina da la Babilonia, ses um il retg Nino. Quai cun l'agid da sia affera, Assur. Il successur al tron, ses figl Ninia, vegn spendrà d'in confident dal retg e po scappar ad uras. Onns suenter returna el sut il num d'Arsace enavos a la curt. I suonda in melodrama tragic cun amurs, passiuns, intrigas e confusiuns. Quai cun solos, duets, terzets ed il chor.

video
Visita ad ina emprova
Or da sil punct dals 29.07.2022.
laschar ir. Durada: 2 minutas.

Per il «coro opera viva» che sa cumpona da laicas e laics saja l'ovra ina sfida, di il manader artistic e dirigent, Gion Gieri Tuor. Perquai ch'il chor conta savens durant ils solos, duetts e terzets, è la coordinaziun cun las solistas ed ils solists pretensiusa.

Davosas emprovas cun focus sin ils moviments

Il reschissur Nikolaus Büchel è davant tribuna e tegna en egl ils moviments da las chantaduras e dals chantadurs. Sin la tribuna cun culissas e requisits po bler ir fauss. Tuts e tuttas ston savair cura esser nua. En las davosas emprovas è il focus tar ils moviments da tuts e tuttas.

audio
Emprova curt avant la premiera da Semiramide
ord Actualitad dals 27.07.2022.
laschar ir. Durada: 4 minutas 27 Secundas.
Sch'ins sa mo las chanzuns, vul quai dir nagut. Nus stuain ir en il pass, sa manar e far. Igl è ina massa che nus stuain resguardar.
Autur: Fina Blumenthal Chantadura dal «coro opera viva»

L'opera ha cun tut las difficultads dals davos dus onns tuttina pudì vegnì realisada. Quai ha dumandà bler energia dals responsabels. L'energia per la musica è tuttina qua. Il plaschair d'entschaiver cun las producziuns avant in public è tar tuts e tuttas palpabels.

Cura ch'ins è vid far musica, survegn ins simplamain energia.
Autur: Gion Gieri Tuor Manader artistic e dirigent

Dapi la premiera dals 29 da fanadur hai dà en tut nov producziuns - enfin tar la derniera dals 13 d'avust.

RTR actualitad 17:00

Artitgels legids il pli savens

Scrollar a sanestra Scrollar a dretga